Бүгін Қазақстанның бірқатар өңірінде ауа райының қолайсыз құбылыстары күтіледі, деп хабарлайды ult.kz Қазақстан Республикасы Төтенше жағдайлар министрлігіне сілтеме жасап.
Ведомствоның мәліметінше, Абай, Жетісу, Алматы, Шығыс Қазақстан, Түркістан, Жамбыл, Қызылорда, Атырау, Маңғыстау, Ақтөбе және Қарағанды облыстарында жоғары және төтенше өрт қаупі сақталады.
Сонымен қатар Абай, Жетісу, Ұлытау, Алматы, Шығыс Қазақстан, Түркістан, Жамбыл және Атырау облыстарында қатты ыстық болады деп болжануда.
Ал Қостанай, Павлодар, Солтүстік Қазақстан, Ақмола, Шығыс Қазақстан, Қарағанды, Ақтөбе және Алматы облыстарында жаңбыр жауып, найзағай ойнап, бұршақ түсуі мүмкін. Сондай-ақ екпінді жел соғады деп күтіледі.
Төтенше жағдайлар министрлігі тұрғындарды ауа райы болжамын қадағалап, қауіпсіздік шараларын сақтауға шақырады. Әсіресе өрт қаупі жоғары аймақтарда ашық от жақпауды, ал қолайсыз ауа райы кезінде алыс жолға шыққанда сақ болуды ескертті.
