Алматыда жыл басынан бері заңсыз сауда жүргізілген 45 орын анықталды. Қалалық әкімдіктің мәліметінше, бұл нүктелерде 1211 адам саудамен айналысқан, деп хабарлайды ult.kz.
Қазірге дейін олардың 27-сі жойылды. Қалған сауда орындарының басым бөлігі ірі базарлардың маңында, соның ішінде «Барахолка» аумағында орналасқан.
Әкімдік мәліметінше, мемлекет меншігіндегі жерлерде орналасқан 516 заңсыз сауда нысаны анықталып, оның 413-і сүрілген. Қалған 103 нысан бойынша тиісті жұмыстар жалғасып жатыр. Сонымен қатар жеке меншік аумақтардағы 1093 нысанға мониторинг жүргізілген.
Қала билігі проблемалық аумақтардағы бақылауды күшейтіп, заңсыз нысандарды бұзу жұмыстарын жалғастырып жатқанын мәлімдеді.
