Әлемге танымал қазақстандық әнші Димаш Құдайберген Алматыдағы Орталық стадионда екі күн қатарынан концерт өткізген Sadraddin-нің жетістігіне қуанып, оның анасы Айгүл Есқараға арнайы хабарласты, деп хабарлайды ult.kz.
Айгүл Есқара әлеуметтік желідегі парақшасында Димашпен болған телефон әңгімесінен үзінді жариялады. Әнші Sadraddin-нің концертінен видеолар көргенін айтып, жас өнерпаздың үлкен сахнадағы жетістігіне қуанышты екенін жеткізген.
"Балаңыздың аяқ алысы құтты болсын. Концерттен үзінді видеоларды көрдім. Керемет өтіпті, бәріміз қуанып жатырмыз. Ініміздің алар белесі, жеңісі көп болсын", – деді Димаш.
Димаш Құдайберген Sadraddin-нің анасының стадионда баласының өнеріне сүйсініп, қуанып тұрған сәті өзіне ерекше әсер еткенін де жасырмады. Бұл көрініс оған өзінің концерттерінде анасының қуанған сәттерін еске түсірген.
"Сіздің қуанып, нұрланып тұрғаныңызды көріп, өз анамның концертімде қуанғанын көргендей әдемі күй кештім. Құтты болсын. Ұзағынан сүйіндірсін", – деп ақ тілегін айтты әнші.
Сонымен қатар Димаш қазір шетелде жеке концертіне дайындалып жүргендіктен, Sadraddin-нің Алматыдағы кешіне келе алмағанын түсіндірді. Елде болған жағдайда жас әріптесіне міндетті түрде қолдау көрсетуге баратынын жеткізген.
Димаш Sadraddin-нің болашақта халықаралық сахнаны бағындырып, әлемнің түкпір-түкпіріндегі ірі стадиондарда концерт беруіне тілектестік білдірді.
"Sadraddin, Алла қаласа, халықаралық деңгейге көтеріліп, әлем бойынша стадиондар жинап, концерт беретін күндері көп болсын", – деді Димаш Құдайберген.
Sadraddin деген кім?
Sadraddin - қазақстандық эстрада әншісі, шын есімі Садраддин Болат. Forbes Kazakhstan мәліметінше, ол Шымкент қаласында музыкалық отбасында дүниеге келген. Әнші бала кезінен үлкен сахнада өнер көрсетуді армандаған. Оның ерекше дауыс тембрі де жас кезінен байқалған. 12 жасында Садраддин "Аялаған Астана" республикалық балалар музыкалық телевизиялық байқауына қатысып, бірінші орын иеленді.
Sadraddin-нің кәсіби шығармашылық жолындағы маңызды кезең 2020 жылдан басталады. Әншінің өзінің айтуынша, сол жылы ол орыс тіліндегі алғашқы "Алия" әнін жарыққа шығарған. Бұл туындыдан кейін орындаушының аудиториямен байланысы күшейіп, шығармашылығына қызығушылық арта түскен. Кейін оның әндері қазақстандық тыңдармандар арасында кеңінен танылды. Бүгінде Sadraddin жас қазақстандық орындаушылар арасында өзіндік музыкалық қолтаңбасымен ерекшеленеді.
Оның шығармашылық жетістіктері түрлі музыкалық марапаттармен де бағаланды. 2024 жылы Sadraddin Ticketon Awards премиясында "Қазақстандық жыл әртісі" атанды. Премияның ресми мәліметінде оның әндері YouTube платформасында ондаған миллион қаралым жинағаны және Almaty Arena-ны көрерменге толтырғаны атап өтіледі.
Сол жылы Садраддин Болат мемлекеттік "Дарын" жастар сыйлығына да ие болды. Ол бұл марапатты "Эстрада" номинациясы бойынша алды. Қазақстанның Мәдениет және ақпарат министрлігі оны ресми тізімде қазақстандық эстрада әншісі ретінде көрсеткен.
2025 жылы Sadraddin Forbes Kazakhstan басылымының "30 до 30" рейтингіне енді. Бұл рейтингке еліміздің түрлі саласында жетістікке жеткен 30 жас маман мен көшбасшы енгізіледі. Forbes оны рейтингте музыкант ретінде таныстырды.
Sadraddin Қазақстан атынан халықаралық мәдени іс-шараларға да қатысып жүр. Мәселен, Қытайдың Циндао қаласында өткен ШЫҰ елдерінің өнер және жастар әні фестивалінде ол Қазақстан атынан өнер көрсетті. Аталған шарада Sadraddin мемлекеттік "Дарын" жастар сыйлығының лауреаты ретінде таныстырылды.
Бүгінде Sadraddin - Қазақстанның қазіргі эстрадасындағы танымал жас орындаушылардың бірі.
Димаш Құдайберген кім?
Димаш Құдайберген - қазақстандық әнші, композитор және мультиаспапшы. Оның толық аты-жөні - Дінмұхаммед Қанатұлы Құдайберген. Ол 1994 жылғы 24 мамырда Ақтөбе қаласында дүниеге келген. Әнші өнерлі отбасында өскен, оның ата-анасы Қанат Айтбаев пен Светлана Айтбаева музыка саласында еңбек еткен.
Димаш музыкамен бала кезінен айналысып, вокалдық қабілетін ерте дамытқан. Кейін кәсіби музыкалық білім алып, орындаушылық шеберлігін жетілдірді. Оның шығармашылығы эстрада, классикалық музыка, опера, рок және халық музыкасы секілді бірнеше бағытты қамтиды. Димаш қазақ, ағылшын, орыс, француз, қытай, испан және итальян тілдерінде ән орындайды.
Әнші ерекше дауыс диапазоны және күрделі вокалдық шығармаларды орындауымен халықаралық аудиторияға танылды. Оның шығармашылығы Қазақстаннан тыс елдерде де кеңінен тарады. Димаш түрлі мемлекеттерде жеке концерттер өткізіп, әлемнің ірі сахналарында өнер көрсетіп жүр. Оның халықаралық жанкүйерлер қауымдастығы да қалыптасқан.
2023 жылы Димаш Құдайбергенге Қазақстан Республикасының Халық әртісі атағы берілді. Ол композитор әрі мультиаспапшы ретінде де танылған. 2025 жылы әнші Қырғыз Республикасының Халық әртісі атанды.
2024 жылы Димаш Құдайберген Халықаралық көші-қон ұйымының Ізгі ниет елшісі болып тағайындалды. Бұл ұйым БҰҰ жүйесіне кіреді және көші-қон мәселелерімен айналысады.
Әншінің шығармашылық жолына арналған көрмелер де ұйымдастырылып келеді. 2024 жылы Қазақстан Республикасының Ұлттық музейінде "Димаш: әлемді бағындыру" атты көрме ашылды.
2026 жылы Алматыдағы Ықылас атындағы халық музыкалық аспаптар музейінде оның жеке қорындағы 70-тен астам жәдігер қойылған "Димаш: бір дауыс – мың ел" көрмесі ұйымдастырылды.
Бүгінде Димаш Құдайберген Қазақстанның атын халықаралық музыка сахнасында танытып жүрген ең танымал өнер өкілдерінің бірі.
