Álemge tanymal qazaqstandyq ánshi Dimash Qudaibergen Almatydaǵy Ortalyq stadionda eki kún qatarynan kontsert ótkizgen Sadraddin-niń jetistigine qýanyp, onyń anasy Aigúl Esqaraǵa arnaiy habarlasty, dep habarlaidy ult.kz.
Aigúl Esqara áleýmettik jelidegi paraqshasynda Dimashpen bolǵan telefon áńgimesinen úzindi jariialady. Ánshi Sadraddin-niń kontsertinen videolar kórgenin aityp, jas ónerpazdyń úlken sahnadaǵy jetistigine qýanyshty ekenin jetkizgen.
"Balańyzdyń aiaq alysy qutty bolsyn. Kontsertten úzindi videolardy kórdim. Keremet ótipti, bárimiz qýanyp jatyrmyz. Inimizdiń alar belesi, jeńisi kóp bolsyn", – dedi Dimash.
Dimash Qudaibergen Sadraddin-niń anasynyń stadionda balasynyń ónerine súisinip, qýanyp turǵan sáti ózine erekshe áser etkenin de jasyrmady. Bul kórinis oǵan óziniń kontsertterinde anasynyń qýanǵan sátterin eske túsirgen.
"Sizdiń qýanyp, nurlanyp turǵanyńyzdy kórip, óz anamnyń kontsertimde qýanǵanyn kórgendei ádemi kúi keshtim. Qutty bolsyn. Uzaǵynan súiindirsin", – dep aq tilegin aitty ánshi.
Sonymen qatar Dimash qazir shetelde jeke kontsertine daiyndalyp júrgendikten, Sadraddin-niń Almatydaǵy keshine kele almaǵanyn túsindirdi. Elde bolǵan jaǵdaida jas áriptesine mindetti túrde qoldaý kórsetýge baratynyn jetkizgen.
Dimash Sadraddin-niń bolashaqta halyqaralyq sahnany baǵyndyryp, álemniń túkpir-túkpirindegi iri stadiondarda kontsert berýine tilektestik bildirdi.
"Sadraddin, Alla qalasa, halyqaralyq deńgeige kóterilip, álem boiynsha stadiondar jinap, kontsert beretin kúnderi kóp bolsyn", – dedi Dimash Qudaibergen.
Sadraddin degen kim?
Sadraddin - qazaqstandyq estrada ánshisi, shyn esimi Sadraddin Bolat. Forbes Kazakhstan málimetinshe, ol Shymkent qalasynda mýzykalyq otbasynda dúniege kelgen. Ánshi bala kezinen úlken sahnada óner kórsetýdi armandaǵan. Onyń erekshe daýys tembri de jas kezinen baiqalǵan. 12 jasynda Sadraddin "Aialaǵan Astana" respýblikalyq balalar mýzykalyq televiziialyq baiqaýyna qatysyp, birinshi oryn ielendi.
Sadraddin-niń kásibi shyǵarmashylyq jolyndaǵy mańyzdy kezeń 2020 jyldan bastalady. Ánshiniń óziniń aitýynsha, sol jyly ol orys tilindegi alǵashqy "Aliia" ánin jaryqqa shyǵarǵan. Bul týyndydan keiin oryndaýshynyń aýditoriiamen bailanysy kúsheiip, shyǵarmashylyǵyna qyzyǵýshylyq arta túsken. Keiin onyń ánderi qazaqstandyq tyńdarmandar arasynda keńinen tanyldy. Búginde Sadraddin jas qazaqstandyq oryndaýshylar arasynda ózindik mýzykalyq qoltańbasymen erekshelenedi.
Onyń shyǵarmashylyq jetistikteri túrli mýzykalyq marapattarmen de baǵalandy. 2024 jyly Sadraddin Ticketon Awards premiiasynda "Qazaqstandyq jyl ártisi" atandy. Premiianyń resmi málimetinde onyń ánderi YouTube platformasynda ondaǵan million qaralym jinaǵany jáne Almaty Arena-ny kórermenge toltyrǵany atap ótiledi.
Sol jyly Sadraddin Bolat memlekettik "Daryn" jastar syilyǵyna da ie boldy. Ol bul marapatty "Estrada" nominatsiiasy boiynsha aldy. Qazaqstannyń Mádeniet jáne aqparat ministrligi ony resmi tizimde qazaqstandyq estrada ánshisi retinde kórsetken.
2025 jyly Sadraddin Forbes Kazakhstan basylymynyń "30 do 30" reitingine endi. Bul reitingke elimizdiń túrli salasynda jetistikke jetken 30 jas maman men kóshbasshy engiziledi. Forbes ony reitingte mýzykant retinde tanystyrdy.
Sadraddin Qazaqstan atynan halyqaralyq mádeni is-sharalarǵa da qatysyp júr. Máselen, Qytaidyń Tsindao qalasynda ótken ShYU elderiniń óner jáne jastar áni festivalinde ol Qazaqstan atynan óner kórsetti. Atalǵan sharada Sadraddin memlekettik "Daryn" jastar syilyǵynyń laýreaty retinde tanystyryldy.
Búginde Sadraddin - Qazaqstannyń qazirgi estradasyndaǵy tanymal jas oryndaýshylardyń biri.
Dimash Qudaibergen kim?
Dimash Qudaibergen - qazaqstandyq ánshi, kompozitor jáne mýltiaspapshy. Onyń tolyq aty-jóni - Dinmuhammed Qanatuly Qudaibergen. Ol 1994 jylǵy 24 mamyrda Aqtóbe qalasynda dúniege kelgen. Ánshi ónerli otbasynda ósken, onyń ata-anasy Qanat Aitbaev pen Svetlana Aitbaeva mýzyka salasynda eńbek etken.
Dimash mýzykamen bala kezinen ainalysyp, vokaldyq qabiletin erte damytqan. Keiin kásibi mýzykalyq bilim alyp, oryndaýshylyq sheberligin jetildirdi. Onyń shyǵarmashylyǵy estrada, klassikalyq mýzyka, opera, rok jáne halyq mýzykasy sekildi birneshe baǵytty qamtidy. Dimash qazaq, aǵylshyn, orys, frantsýz, qytai, ispan jáne italian tilderinde án oryndaidy.
Ánshi erekshe daýys diapazony jáne kúrdeli vokaldyq shyǵarmalardy oryndaýymen halyqaralyq aýditoriiaǵa tanyldy. Onyń shyǵarmashylyǵy Qazaqstannan tys elderde de keńinen tarady. Dimash túrli memleketterde jeke kontsertter ótkizip, álemniń iri sahnalarynda óner kórsetip júr. Onyń halyqaralyq jankúierler qaýymdastyǵy da qalyptasqan.
2023 jyly Dimash Qudaibergenge Qazaqstan Respýblikasynyń Halyq ártisi ataǵy berildi. Ol kompozitor ári mýltiaspapshy retinde de tanylǵan. 2025 jyly ánshi Qyrǵyz Respýblikasynyń Halyq ártisi atandy.
2024 jyly Dimash Qudaibergen Halyqaralyq kóshi-qon uiymynyń Izgi niet elshisi bolyp taǵaiyndaldy. Bul uiym BUU júiesine kiredi jáne kóshi-qon máselelerimen ainalysady.
Ánshiniń shyǵarmashylyq jolyna arnalǵan kórmeler de uiymdastyrylyp keledi. 2024 jyly Qazaqstan Respýblikasynyń Ulttyq mýzeiinde "Dimash: álemdi baǵyndyrý" atty kórme ashyldy.
2026 jyly Almatydaǵy Yqylas atyndaǵy halyq mýzykalyq aspaptar mýzeiinde onyń jeke qoryndaǵy 70-ten astam jádiger qoiylǵan "Dimash: bir daýys – myń el" kórmesi uiymdastyryldy.
Búginde Dimash Qudaibergen Qazaqstannyń atyn halyqaralyq mýzyka sahnasynda tanytyp júrgen eń tanymal óner ókilderiniń biri.
