Ақмола облысында жолда қалған Тәжікстан Республикасының 29 азаматы құтқарылды, деп хабарлайды облыстық ТЖД баспасөз қызметі.
Ведомствоның мәліметінше, Бурабай ауданының аумағында «Нұр-Сұлтан-Петропавл» күре жолының бойында «Сетра» жолаушылар автобусы техникалық ақауларға байланысты істен шығып, тоқтауға мәжбүр болған.
«Автобус Тәжікстаннан Ресейдің Сүргіт қаласына бағыт алған. Көлік ішінде барлығы 26 жолаушы мен 3 жүргізуші болды. Жолаушылардың барлығы Тәжікстан азаматтары, олардың төртеуі әйел де, біреуі бала. Араларында зардап шеккендер жоқ. Автобуста болған жолаушылар екіге бөлініп, «Щучинск қаласындағы жоғары техникалық колледжінің №13 және «Жалпы типтегі мектеп инернатының жатақханаларына жайғастырылды. Ешқайсысына медициналық көмек қажет болған жоқ», деп мәлім етті Бурабай аудандық ТЖБ бастығы міндетін атқарушы Қанат Бабаев.
