Фото: ашық дереккөз
Депутат Асхат Аймағамбетов биыл әлеуметтік-мәдени комитет қазақ тіліндегі мультфильмдерге республикалық бюджетті қарау кезінде 300 млн теңге бөлінуіне ұсыныс жасап, қол жеткізгенін, алайда ендігі мәселе - олардың мазмұны, сапасы және қолжетімділігін реттеу болып тұрғанын жазды, деп хабарлайды Ult.kz.
Депутат мультфильм баланың алғашқы ұстазы екенін айтады. Сондықтан мультфильмдерді жай ғана көңіл көтеру құралы емес, тәрбие мен таным негізі деп қабылдаған жөн, дейді ол.
"Balapan — балалар тіліне көпір болған арна. Менің өз балаларым “Балапан” арнасын көріп, тілі шықты. “Балапанның” жасаған мультфильмдері — сапалы, көркем, тартымды. “Қазақстан” РТРК АҚ үлкен жұмыс жүргізуде. Енді осы тәжірибені кеңейтіп, қолдап, сапаны одан әрі арттыруымыз қажет", - дейді ол.
Осыдан кейін Аймағамбетов балалардың негізгі алаңы — YouTube желісінде даму маңызды деп санайды.
"Бүгінде балалардың көбі телевизор емес, YouTube көреді. Қазақ тіліндегі сапалы, балаларға тартымды мультфильмдер YouTube-та қолжетімді болуы қажет. Жас ерекшеліктеріне сай плейлисттер мен сериялар құрылуы керек", - деп есептейді депутат.
Айтуынша, мультфильмдердің тілі де маңызды рөл ойнайды. Ол — табиғи болуы шарт.
"Кейбір мультфильмдерде кейіпкерлер канцеляризммен, жасанды тілмен сөйлейді. Бұл — баланың құлағына түсініксіз, қызықсыз, жат естіледі. Сондықтан қарапайым, шынайы, тірі қазақ тілі қолданылуы тиіс. Бала тыңдап, өз тілімен байланыс орнатуы керек", - деп жазды Аймағамбетов.
Сондай-ақ депутаттар ЖОО-ларда мультфильм мамандарын дайындайтын оқу бағдарламаларын кеңейтуді, 2D және 3D форматтағы анимацияны оқытуды ұсынған.
"Мультфильм нақты мақсатпен жасалуы керек. Әр мультфильм нақты мәселені шешіп, балаға нақты дағды немесе құндылық беруі тиіс", - дейді Асхат Аймағамбетов.
12598 рет оқылды_140_110.jpg)
