Foto: ashyq derekkóz
Depýtat Ashat Aimaǵambetov biyl áleýmettik-mádeni komitet qazaq tilindegi mýltfilmderge respýblikalyq biýdjetti qaraý kezinde 300 mln teńge bólinýine usynys jasap, qol jetkizgenin, alaida endigi másele - olardyń mazmuny, sapasy jáne qoljetimdiligin retteý bolyp turǵanyn jazdy, dep habarlaidy Ult.kz.
Depýtat mýltfilm balanyń alǵashqy ustazy ekenin aitady. Sondyqtan mýltfilmderdi jai ǵana kóńil kóterý quraly emes, tárbie men tanym negizi dep qabyldaǵan jón, deidi ol.
"Balapan — balalar tiline kópir bolǵan arna. Meniń óz balalarym “Balapan” arnasyn kórip, tili shyqty. “Balapannyń” jasaǵan mýltfilmderi — sapaly, kórkem, tartymdy. “Qazaqstan” RTRK AQ úlken jumys júrgizýde. Endi osy tájiribeni keńeitip, qoldap, sapany odan ári arttyrýymyz qajet", - deidi ol.
Osydan keiin Aimaǵambetov balalardyń negizgi alańy — YouTube jelisinde damý mańyzdy dep sanaidy.
"Búginde balalardyń kóbi televizor emes, YouTube kóredi. Qazaq tilindegi sapaly, balalarǵa tartymdy mýltfilmder YouTube-ta qoljetimdi bolýy qajet. Jas erekshelikterine sai pleilistter men seriialar qurylýy kerek", - dep esepteidi depýtat.
Aitýynsha, mýltfilmderdiń tili de mańyzdy ról oinaidy. Ol — tabiǵi bolýy shart.
"Keibir mýltfilmderde keiipkerler kantseliarizmmen, jasandy tilmen sóileidi. Bul — balanyń qulaǵyna túsiniksiz, qyzyqsyz, jat estiledi. Sondyqtan qarapaiym, shynaiy, tiri qazaq tili qoldanylýy tiis. Bala tyńdap, óz tilimen bailanys ornatýy kerek", - dep jazdy Aimaǵambetov.
Sondai-aq depýtattar JOO-larda mýltfilm mamandaryn daiyndaityn oqý baǵdarlamalaryn keńeitýdi, 2D jáne 3D formattaǵy animatsiiany oqytýdy usynǵan.
"Mýltfilm naqty maqsatpen jasalýy kerek. Ár mýltfilm naqty máseleni sheship, balaǵa naqty daǵdy nemese qundylyq berýi tiis", - deidi Ashat Aimaǵambetov.
