_48_48.jpg)
TikTok желісінде бір миллионнан астам жазылушысы бар блогер Қолғанат Жұмабаевқа қатысты оның әйелі жағаұстатар мәлімдеме жасады, деп хабарлайды Ult.kz.
Қолғанат Жұмабаевтың жұбайы Құлпынай Калменова күйеуі 10-12 жастағы қыздарға махаббат хаттарын жазып, құшақтасып суретке түскенін айтып отыр. Мұның бәрін блогердің әйелі әлеуметтік желіге салып, халықтан көмек сұрады. Айтуынша, күйеуі мен оның туыстары және фотодағы қыздардың әке-шешесі оны сотқа береміз деп қысым жасап жатыр.
«Өлердей жиіркенемін»
Бастапқыда Құлпынай Калменова (@kulpynai_ka) миллиондаған аудиториясы бар блогер күйеуі ортақ баласына қараспайтынын, еміне ақша бермейтінін айтып, видео жариялаған. Ол Қолғанат Жұмабаевтан (@zhumabaev_07) кеткенін, алайда ажырасқалы бері ол баласын тіпті ұмытқанын айтады. Осыдан кейін күйеуінің туыстары оған қысым жасап, видеоны өшіруді талап ете бастаған. Ашынған әйел осыдан кейін күйеуінің 10-12 жастағы қыздарға түннің бір уағында жазғанын, олармен құшақтасып суретке түсетінін жариялады.
«Өлердей жиіркенемін. Мынандай адаммен 5 жыл бірге тұрыпты ғой деген ойдың өзі өлтіріп барады. Егер ол үлкен әйел болса, жеңіл жүрісті біреу болса, тоқалы болса, дәл осылай ызыланбайтын едім. Оны жайына жібере салатын едім. Бұл жерде кішкентай қыздар, әлі кәмелеткен де толмаған. Менің байым түнгі 12-де қасымда жатып, кішкентай 10-11 жастағы қыздың жекесіне «сен сондай әдемісің, қарай беремін ғой, өзім ғашық болып қалдым ғой» деп жазған. Біріншіден, ол психологиялық дұрыс адам емес. Екіншіден, бұл – қылмыс. Ал ондай адаммен мен бірге өмір сүрмеймін», - дейді Құлпынай Калменова.
«Мұның бәрі сіздерге біртүрлі көрінбей ме?»
Осыдан кейін іске танымал блогер, феминист Роза Әшірбаева араласып, бұл жағдайдың көзден таса қалмауы керегін айтты. Ол ҚР бала құқығы жөніндегі уәкілі Динара Зәкиеваның әлеуметтік желідегі парақшасын белгілеп, істі өз назарына алуды сұрады.
«30 жастағы еркек бөтен 10-11 жастағы қызға «ғашықпын» деп жазып, шашынан иіскеп, суретке түсуі, түнгі 12-де хат жазуы қалыпты ма, қалай ойлайсыздар? Бұл жағдайдың педофелизм екені маған да, сіздерге де түсінікті. Бірақ қандай жағдай болмасын біз заңды түрде жұмыс істеуіміз керек», - деп Роза Әшірбаева Динара Зәкиеваның парақшасын белгілеп, көмек сұрады.
Роза Әшірбаева бұл мәселеде тағы бір назар аударарлық тұсы – миллионнан астам жазылушысы бар блогер Қолғанат Жұмабаев кәмелетке толмаған балалармен ғана контент жасайтынына назар аударған.
«Ең сорақысы, Қолғанаттың өз бизнесі бар – бұл балаларға арналған барбершоп. Ересектерге емес, балаларға арналған. Яғни ол үнемі балалармен байланыста және қателесуім де мүмкін, алайда Құлпынайдың келбеті де, түрі де бала сияқты. Бір баланың анасы сияқты емес. Мұның бәрі сіздерге біртүрлі көрінбей ме?», - дейді танымал блогер.
«Ешқандай педофил көріп тұрған жоқпын»
Әлеуметтік желіде шу шыққаннан кейін Қолғанат Жұмабаев қыздардың анасымен бірге видео түсіріп, ешқандай алымсақтық болмағанын айтты. Аналары қыздарының жігітке «аға» деп қарап, сыйлайтынын жеткізді.
«Қазір шулап жатқан әңгіменің бәрі менің екі қызым мен Құлпынай ханымның педофил күйеуі туралы болып жатыр ғой. Бұл жерде мен педофилді көріп тұрған жоқпын. Менің Айша деген қызым осы жерде видеоконтент түсіреді. Ол жерде мен өзім де қатысамын. «Бұл қыздардың шешелері қайда» деп жатыр. Мен – шешесімін. Мен бәрін көріп отырмын, бірақ Құлпынай ханымның арандатуына еріп отырған жоқпын. Жолдасымның ашуын басып отырмын. Қолғанатқа күйеуім шашын алдыртады. Бәрін біледі. Қыздарым оны ағасындай көреді. Ол әйелге ақша керек пе, ажырасқысы келе ме, хиджаб сататын дүкенін жарнамалағысы келе ме, істей берсін, бірақ біздің қыздардың не қатысы бар мұнда? Не себепті қыздарымның суретін, видеосын менің рұқсатымсыз жариялаған? Мен заңға жүгінемін», - дейді қыздардың анасы.
Осыдан кейін анасы қыздардан «Шашыңнан иіскеді ме ағай» деп сұрақ қояды. Қыздың айтуынша, жігіт ол жерде жай ғана құлағына сыбырлап, бірдеңе айтқан және ешқашан құшақтап, денесін сипаламаған.
«Мен ағайды туған ағамдай көремін. Оны ағамдай сыйлаймын. Біз осы жерде 3-5 қыз болып жүреміз, ұлдар да келеді», - дейді қыз.
Қыздардың анасы Құлпынай Калменованың өзін айыптап, күйеуін педофил дегеніне шүйлікті.
«Күйеуіңіздің жаманшылығын жасырып, жақсылығын асыратын адамсыз ғой. Сіз сияқты әйелі бар болғанына Қолғанатты аяп отырмын. Жағамды ұстаймын», - дейді ол.
Тағы бір ата-ана Қолғанатты бір жылдан бері танитынын, оның бойынан ерсі ештеңе байқамағанын айтты.
Қазір Құлпынай Калменова үстінен арыз жазылғанын, аккаунты экспертизаға жіберілгенін айтты.
«Маған 500 мың теңгеден 5 миллионға дейін айыппұл салынуы мүмкін екен. Маған видеоларды өшір деп жатыр, мен өшірмеймін. Осындай айыппұл келсе маған көмектесуге дайынсыздар ма?», - дейді ол.
Психолог пікірі
Бала психологиясы жөнінде сарапшы Ақгүл Амантайқызы педофил өзін бірден әшкерелемейтінін ескертті. Ол қитұрқы әрекетке бармас бұрын баламен ұзақ уақыт байланыс орнатып, әбден сеніміне кіріп алуды мақсат тұтады дейді.
«Педофилді түріне қарап тану мүмкін емес. Оның кейбір әрекеттері күмән тудыра бастайды. Қандай әрекеттер? Педофилдер, біріншіден, өте балажан болады. Олар көп баланың арасынан бір баланы таңдап алып, ерекше назарында ұстайды. Соның көңілін табуға, сонымен жиі ойнауға тырысады. Сізге "Балаңды мен алып кетейін, мен қарап қалайын" деп көмегін ұсынуы мүмкін. Ата-аналар ана адам педофил екенін тіпті сезбейді. Сіз жақсы танитын адамның өзі педофил болып шығуы мүмкін. Сосын педофилдер бірден зорлық жасамайды. Олар ұзақ уақыт бойы баламен достық қарым-қатынас орнатады, ұзақ уақыт бойы балаңыздың сеніміне кіреді. Содан кейін барып өзінің арам әрекеттерін жүзеге асырады. Соңында әке-шеше шок болып, сенбей қалуы да мүмкін. Міндетті түрде, осыған назар аударыңыздар», - деп ескертті ол.
329 рет оқылды_140_110.jpg)
_140_110.jpg)
