TikTok jelisinde bir millionnan astam jazylýshysy bar bloger Qolǵanat Jumabaevqa qatysty onyń áieli jaǵaustatar málimdeme jasady, dep habarlaidy Ult.kz.
Qolǵanat Jumabaevtyń jubaiy Qulpynai Kalmenova kúieýi 10-12 jastaǵy qyzdarǵa mahabbat hattaryn jazyp, qushaqtasyp sýretke túskenin aityp otyr. Munyń bárin blogerdiń áieli áleýmettik jelige salyp, halyqtan kómek surady. Aitýynsha, kúieýi men onyń týystary jáne fotodaǵy qyzdardyń áke-sheshesi ony sotqa beremiz dep qysym jasap jatyr.
«Ólerdei jiirkenemin»
Bastapqyda Qulpynai Kalmenova (@kulpynai_ka) milliondaǵan aýditoriiasy bar bloger kúieýi ortaq balasyna qaraspaitynyn, emine aqsha bermeitinin aityp, video jariialaǵan. Ol Qolǵanat Jumabaevtan (@zhumabaev_07) ketkenin, alaida ajyrasqaly beri ol balasyn tipti umytqanyn aitady. Osydan keiin kúieýiniń týystary oǵan qysym jasap, videony óshirýdi talap ete bastaǵan. Ashynǵan áiel osydan keiin kúieýiniń 10-12 jastaǵy qyzdarǵa túnniń bir ýaǵynda jazǵanyn, olarmen qushaqtasyp sýretke túsetinin jariialady.
«Ólerdei jiirkenemin. Mynandai adammen 5 jyl birge turypty ǵoi degen oidyń ózi óltirip barady. Eger ol úlken áiel bolsa, jeńil júristi bireý bolsa, toqaly bolsa, dál osylai yzylanbaityn edim. Ony jaiyna jibere salatyn edim. Bul jerde kishkentai qyzdar, áli kámeletken de tolmaǵan. Meniń baiym túngi 12-de qasymda jatyp, kishkentai 10-11 jastaǵy qyzdyń jekesine «sen sondai ádemisiń, qarai beremin ǵoi, ózim ǵashyq bolyp qaldym ǵoi» dep jazǵan. Birinshiden, ol psihologiialyq durys adam emes. Ekinshiden, bul – qylmys. Al ondai adammen men birge ómir súrmeimin», - deidi Qulpynai Kalmenova.
«Munyń bári sizderge birtúrli kórinbei me?»
Osydan keiin iske tanymal bloger, feminist Roza Áshirbaeva aralasyp, bul jaǵdaidyń kózden tasa qalmaýy keregin aitty. Ol QR bala quqyǵy jónindegi ýákili Dinara Zákievanyń áleýmettik jelidegi paraqshasyn belgilep, isti óz nazaryna alýdy surady.
«30 jastaǵy erkek bóten 10-11 jastaǵy qyzǵa «ǵashyqpyn» dep jazyp, shashynan iiskep, sýretke túsýi, túngi 12-de hat jazýy qalypty ma, qalai oilaisyzdar? Bul jaǵdaidyń pedofelizm ekeni maǵan da, sizderge de túsinikti. Biraq qandai jaǵdai bolmasyn biz zańdy túrde jumys isteýimiz kerek», - dep Roza Áshirbaeva Dinara Zákievanyń paraqshasyn belgilep, kómek surady.
Roza Áshirbaeva bul máselede taǵy bir nazar aýdararlyq tusy – millionnan astam jazylýshysy bar bloger Qolǵanat Jumabaev kámeletke tolmaǵan balalarmen ǵana kontent jasaitynyna nazar aýdarǵan.
«Eń soraqysy, Qolǵanattyń óz biznesi bar – bul balalarǵa arnalǵan barbershop. Eresekterge emes, balalarǵa arnalǵan. Iaǵni ol únemi balalarmen bailanysta jáne qatelesýim de múmkin, alaida Qulpynaidyń kelbeti de, túri de bala siiaqty. Bir balanyń anasy siiaqty emes. Munyń bári sizderge birtúrli kórinbei me?», - deidi tanymal bloger.
«Eshqandai pedofil kórip turǵan joqpyn»
Áleýmettik jelide shý shyqqannan keiin Qolǵanat Jumabaev qyzdardyń anasymen birge video túsirip, eshqandai alymsaqtyq bolmaǵanyn aitty. Analary qyzdarynyń jigitke «aǵa» dep qarap, syilaitynyn jetkizdi.
«Qazir shýlap jatqan áńgimeniń bári meniń eki qyzym men Qulpynai hanymnyń pedofil kúieýi týraly bolyp jatyr ǵoi. Bul jerde men pedofildi kórip turǵan joqpyn. Meniń Aisha degen qyzym osy jerde videokontent túsiredi. Ol jerde men ózim de qatysamyn. «Bul qyzdardyń shesheleri qaida» dep jatyr. Men – sheshesimin. Men bárin kórip otyrmyn, biraq Qulpynai hanymnyń arandatýyna erip otyrǵan joqpyn. Joldasymnyń ashýyn basyp otyrmyn. Qolǵanatqa kúieýim shashyn aldyrtady. Bárin biledi. Qyzdarym ony aǵasyndai kóredi. Ol áielge aqsha kerek pe, ajyrasqysy kele me, hidjab satatyn dúkenin jarnamalaǵysy kele me, istei bersin, biraq bizdiń qyzdardyń ne qatysy bar munda? Ne sebepti qyzdarymnyń sýretin, videosyn meniń ruqsatymsyz jariialaǵan? Men zańǵa júginemin», - deidi qyzdardyń anasy.
Osydan keiin anasy qyzdardan «Shashyńnan iiskedi me aǵai» dep suraq qoiady. Qyzdyń aitýynsha, jigit ol jerde jai ǵana qulaǵyna sybyrlap, birdeńe aitqan jáne eshqashan qushaqtap, denesin sipalamaǵan.
«Men aǵaidy týǵan aǵamdai kóremin. Ony aǵamdai syilaimyn. Biz osy jerde 3-5 qyz bolyp júremiz, uldar da keledi», - deidi qyz.
Qyzdardyń anasy Qulpynai Kalmenovanyń ózin aiyptap, kúieýin pedofil degenine shúilikti.
«Kúieýińizdiń jamanshylyǵyn jasyryp, jaqsylyǵyn asyratyn adamsyz ǵoi. Siz siiaqty áieli bar bolǵanyna Qolǵanatty aiap otyrmyn. Jaǵamdy ustaimyn», - deidi ol.
Taǵy bir ata-ana Qolǵanatty bir jyldan beri tanitynyn, onyń boiynan ersi eshteńe baiqamaǵanyn aitty.
Qazir Qulpynai Kalmenova ústinen aryz jazylǵanyn, akkaýnty ekspertizaǵa jiberilgenin aitty.
«Maǵan 500 myń teńgeden 5 millionǵa deiin aiyppul salynýy múmkin eken. Maǵan videolardy óshir dep jatyr, men óshirmeimin. Osyndai aiyppul kelse maǵan kómektesýge daiynsyzdar ma?», - deidi ol.
Psiholog pikiri
Bala psihologiiasy jóninde sarapshy Aqgúl Amantaiqyzy pedofil ózin birden áshkerelemeitinin eskertti. Ol qiturqy áreketke barmas buryn balamen uzaq ýaqyt bailanys ornatyp, ábden senimine kirip alýdy maqsat tutady deidi.
«Pedofildi túrine qarap taný múmkin emes. Onyń keibir áreketteri kúmán týdyra bastaidy. Qandai áreketter? Pedofilder, birinshiden, óte balajan bolady. Olar kóp balanyń arasynan bir balany tańdap alyp, erekshe nazarynda ustaidy. Sonyń kóńilin tabýǵa, sonymen jii oinaýǵa tyrysady. Sizge "Balańdy men alyp keteiin, men qarap qalaiyn" dep kómegin usynýy múmkin. Ata-analar ana adam pedofil ekenin tipti sezbeidi. Siz jaqsy tanityn adamnyń ózi pedofil bolyp shyǵýy múmkin. Sosyn pedofilder birden zorlyq jasamaidy. Olar uzaq ýaqyt boiy balamen dostyq qarym-qatynas ornatady, uzaq ýaqyt boiy balańyzdyń senimine kiredi. Sodan keiin baryp óziniń aram áreketterin júzege asyrady. Sońynda áke-sheshe shok bolyp, senbei qalýy da múmkin. Mindetti túrde, osyǵan nazar aýdaryńyzdar», - dep eskertti ol.
