Astanada jalpy quny 4,4 mlrd teńgeden asatyn 170 páterdi jalǵan qujattar arqyly iemdenbek bolǵan qylmystyq top áshkerelendi. Kúdiktiler arasynda politsiia qyzmetkerleri de bar, dep habarlaidy ult.kz.
Tergeý málimetinshe, «Tólendi» turǵyn úi-qurylys kooperativiniń burynǵy basshysy 2016 jyly 1,5 myń úleskerdiń 10 mlrd teńgesin jymqyrǵany úshin segiz jylǵa sottalǵan. Bostandyqqa shyqqannan keiin ol sybailastarymen birge áleýmettik osal toptarǵa berilýi tiis páterlerdi iemdenýdi josparlaǵan.
Olar 80-nen astam adamnyń atyna jalǵan kelisimsharttar jasap, solardyń atynan aryz túsirgen. Sot sheshimi arqyly páterlerdi óz atyna rásimdep, keiin satpaq bolǵan. Jalǵan kelisimsharttardy satyp alǵan azamattarǵa 400 mln teńgeden astam shyǵyn kelgen.
Is boiynsha 19 adam kúdikti dep tanylyp, toǵyzy qamaýǵa alyndy. Kúdiktilerdiń 250 mln teńgeden asatyn múlkine tyiym salyndy. Politsiia qyzmetkerlerine qatysty laýazymdyq ókilettikterin teris paidalaný jáne dáleldemelerdi burmalaý derekteri boiynsha tergeý júrgizildi.
Sotqa deiingi tergeý aiaqtalyp, taraptar is materialdarymen tanysyp jatyr.
