Kaspii teńizindegi qaiǵyly oqiǵadan aman qalǵan Aqjol Temirhannyń anasy Samal Keýelova sarbazdardyń aýrýhanada jatqan kezin eske aldy. Onyń áleýmettik jelidegi jazbasy kópshilikti tolqytty, dep habarlaidy ult.kz.

Sýrettegi Aqjol, Beket jáne Nikita — sol oqiǵadan aman qalǵan sarbazdar. Aýrýhanada ótkizgen úsh-tórt kúnde Samal Keýelova óz ulymen birge palatadaǵy eki jigitke de qamqor bolyp, úsheýin birdei baýyryna basqan.

Ananyń aitýynsha, sol qiyn kúnderi týystary ǵana emes, buryn tanymaǵan adamdar da qol ushyn sozǵan. Biri tamaq jetkizse, endi biri habarlasyp, sarbazdardyń jaǵdaiyn surap otyrǵan.

"Aǵaiyn-týystan bólek, múlde tanymaityn adamdar da kómektesip jatty. Biri tamaq ákelse, biri jaǵdaiymyzdy surap habarlasty… Qiyndyqta adamnyń kim ekeni emes, júreginiń qandai ekeni kórinedi",- dep jazdy Samal Keýelova.

Elimizdiń ár óńirinen qoldaý bildirgen jandardyń yqylasy sarbazdar men olardyń jaqyndaryna demeý bolǵan.

Aita keteiik, Azamattyń aǵasy marqum inisiniń saǵatyn Aqjol Temirhanǵa tabystady.

Ne jaǵdai boldy? 
 

Eske salaiyq, 2026 jylǵy 24 qyrkúiekte Mańǵystaý oblysynda Kaspii teńizindegi áskeri oqý-jattyǵý kezinde 14 áskeri qyzmetshi qaza tapty. Qorǵanys ministrliginiń málimetinshe, oqý-jaýyngerlik tapsyrmany oryndaý barysynda aýa raiy kúrt nasharlap, 17 áskeri qyzmetshini ashyq teńizge aǵyzyp áketken. Olardyń úsheýi aman qaldy. Sońǵy eki áskeri qyzmetshiniń denesi 25 qyrkúiekte tabylyp, izdeý jumystary aiaqtaldy.

Qaiǵyly oqiǵaǵa bailanysty 25 qyrkúiek Qazaqstanda jalpyulttyq aza tutý kúni bolyp jariialandy. Prezident qaza tapqandardyń jaqyndaryna kóńil aityp, oqiǵanyń mán-jaiyn anyqtaýdy jáne marqumdardyń otbasylaryna kómek kórsetýdi tapsyrdy.