Фото: Pexels.com
Forbes World’s Billionaires 2025 рейтингіне жеті қазақстандық бизнесмен енді. Олардың жиынтық байлығы 38,8 млрд долларға жетті, деп хабарлайды Ult.kz.
Қазақстандық миллиардерлер арасында көшбасшылықты Вячеслав Ким сақтап қалды. Оның байлығы 7,1 млрд доллар болып, әлемдік рейтингте 464-орынға көтерілді (өткен жылы – 511-орын). Бір жыл ішінде Кимнің капиталы 1,3 млрд долларға артқан, бұл оны Қазақстандағы ең бай кәсіпкер ретінде қалдырды.
Кимнің серіктесі Михаил Ломтадзе Қазақстандағы екінші ең бай бизнесмен атанды. Ол әлемдік тізімде 597-орынға жайғасты. Оның байлығы 5,9 млрд доллар деп бағалануда.
Тимур Турлов рейтингте айтарлықтай серпіліс жасады. Freedom Holding иесі өз байлығын екі есеге жуық арттырды – 3,3 млрд доллардан 5,8 млрд долларға дейін. Нәтижесінде, ол әлемдік тізімде 991-орыннан 605-орынға көтеріліп, көптеген әйгілі бизнесмендерді басып озды.
Төртінші орында KAZ Minerals және Қазақмыс акционері Владимир Ким тұр. Өткен жылы оның байлығы 3,6 млрд доллар деп бағаланса, биыл 5,7 млрд долларға жетіп, ол рейтингте 896-орыннан 620-орынға көтерілді.
Әдетте Қазақстанның ең бай адамдарының қатарында болатын Тимур және Динара Құлыбаевтар биыл өз позицияларынан сәл төмендеді. Әрқайсысының байлығы 5,3 млрд доллар болса да, олар әлемдік рейтингте 612-орыннан 673-орынға түсті.
Forbes тізіміндегі қазақстандық миллиардерлердің соңғысы – Болат Өтемұратов, ForteBank акционері. Оның байлығы 1 млрд долларға өсіп, 3,7 млрд долларға жетті. Ол рейтингте 1238-орыннан 979-орынға көтерілді.
Әлемдегі ең бай адамдар
Әлемдік рейтингті тағы да Илон Маск бастады. Оның байлығы бір жылда 147 млрд долларға өсіп, 342 млрд долларға жетті.
Бұрынғы көшбасшы, Louis Vuitton Moët Hennessy компаниясының иесі Бернар Арно қазір бесінші орында. Оның капиталы 55 млрд долларға қысқарып, 178 млрд долларды құрады.
Екінші орынды Марк Цукерберг (Meta) 216 млрд доллармен, ал үшінші орынды Джефф Безос (Amazon) 215 млрд доллармен иеленді.
Жалпы, әлемнің ең бай 20 адамының жиынтық байлығы 2,8 трлн долларды құрайды.
47144 рет оқылды
