Foto: Pexels.com
Forbes World’s Billionaires 2025 reitingine jeti qazaqstandyq biznesmen endi. Olardyń jiyntyq bailyǵy 38,8 mlrd dollarǵa jetti, dep habarlaidy Ult.kz.
Qazaqstandyq milliarderler arasynda kóshbasshylyqty Viacheslav Kim saqtap qaldy. Onyń bailyǵy 7,1 mlrd dollar bolyp, álemdik reitingte 464-orynǵa kóterildi (ótken jyly – 511-oryn). Bir jyl ishinde Kimniń kapitaly 1,3 mlrd dollarǵa artqan, bul ony Qazaqstandaǵy eń bai kásipker retinde qaldyrdy.
Kimniń seriktesi Mihail Lomtadze Qazaqstandaǵy ekinshi eń bai biznesmen atandy. Ol álemdik tizimde 597-orynǵa jaiǵasty. Onyń bailyǵy 5,9 mlrd dollar dep baǵalanýda.
Timýr Týrlov reitingte aitarlyqtai serpilis jasady. Freedom Holding iesi óz bailyǵyn eki esege jýyq arttyrdy – 3,3 mlrd dollardan 5,8 mlrd dollarǵa deiin. Nátijesinde, ol álemdik tizimde 991-orynnan 605-orynǵa kóterilip, kóptegen áigili biznesmenderdi basyp ozdy.
Tórtinshi orynda KAZ Minerals jáne Qazaqmys aktsioneri Vladimir Kim tur. Ótken jyly onyń bailyǵy 3,6 mlrd dollar dep baǵalansa, biyl 5,7 mlrd dollarǵa jetip, ol reitingte 896-orynnan 620-orynǵa kóterildi.
Ádette Qazaqstannyń eń bai adamdarynyń qatarynda bolatyn Timýr jáne Dinara Qulybaevtar biyl óz pozitsiialarynan sál tómendedi. Árqaisysynyń bailyǵy 5,3 mlrd dollar bolsa da, olar álemdik reitingte 612-orynnan 673-orynǵa tústi.
Forbes tizimindegi qazaqstandyq milliarderlerdiń sońǵysy – Bolat Ótemuratov, ForteBank aktsioneri. Onyń bailyǵy 1 mlrd dollarǵa ósip, 3,7 mlrd dollarǵa jetti. Ol reitingte 1238-orynnan 979-orynǵa kóterildi.
Álemdegi eń bai adamdar
Álemdik reitingti taǵy da Ilon Mask bastady. Onyń bailyǵy bir jylda 147 mlrd dollarǵa ósip, 342 mlrd dollarǵa jetti.
Burynǵy kóshbasshy, Louis Vuitton Moët Hennessy kompaniiasynyń iesi Bernar Arno qazir besinshi orynda. Onyń kapitaly 55 mlrd dollarǵa qysqaryp, 178 mlrd dollardy qurady.
Ekinshi oryndy Mark Tsýkerberg (Meta) 216 mlrd dollarmen, al úshinshi oryndy Djeff Bezos (Amazon) 215 mlrd dollarmen ielendi.
Jalpy, álemniń eń bai 20 adamynyń jiyntyq bailyǵy 2,8 trln dollardy quraidy.
