2027 jyly B2B shegerimderi qaita engizilmese, kásipkerler salyq tóleýge qarajat tapshylyǵyna tap bolýy múmkin. Bul týraly kásipker ári sarapshy Maksim Baryshev málimdedi, dep habarlaidy ult.kz.
Sarapshynyń aitýynsha, Salyq kodeksine engiziletin ózgerister qarasha aiynyń sońyna deiin ázirlenip, Quryltaidyń qaraýyna usynylýy tiis. Odan keiin shamamen eki apta ishinde qujat Memleket basshysynyń qol qoiýyna jiberiledi. Osylaisha, ózgerister 2027 jyldyń qańtarynan bastap kúshine enýi múmkin.
«Meniń oiymsha, eń aldymen, ońailatylǵan deklaratsiia negizinde jumys isteitin kásipkerlerge jalpyǵa birdei belgilengen salyq rejimindegi kásipkerlermen ózara jumys isteýge múmkindik berý kerek. Iaǵni B2B operatsiialary boiynsha shyǵystardy shegerimge jatqyzýǵa salynǵan tyiymdy alyp tastaý qajet.
Ekinshiden, jalaqyǵa bailanysty biýdjetke jáne biýdjetten tys qorlarǵa tólenetin salyqtar men basqa da mindetti tólemderdi biriktirip, jalpy salyq júktemesin azaitý kerek.
Úshinshiden, kásipkerlerdi tekserý jáne baqylaý júiesin qaita qaraý qajet. Áńgime salystyrmaly baqylaý týraly bolyp otyr. Onyń nátijesinde kásipkerdiń bank shottary buǵattalyp, elektrondyq shot-faktýralardy rásimdeý múmkindigi toqtatylýy múmkin. Menińshe, bul júieni qaita qaraý qajet», – dedi ol forým aiasyndaǵy baspasóz máslihatynda.
Maksim Baryshev Salyq kodeksine engiziletin osy ózgeristerdiń alǵashqy túzetýler paketine qosylý múmkindigine de toqtaldy.
«Iá, bul usynystar paketke enýi múmkin. Olardyń túzetýler qataryna qosylýy úshin qoldan kelgenniń bárin jasap jatyrmyz. Shegerimderge qatysty shekteýdi keri kúshpen, iaǵni 2026 jyldyń 1 qańtarynan bastap alyp tastaýǵa bolady. Salyq zańnamasyndaǵy ózgeristerdiń negizgi máni men eń mańyzdy tusy – osy», – dep jaýap berdi sarapshy.
Onyń aitýynsha, qazirgi tańda kásipkerlerdiń basym bóligi keńselerdi jalǵa alady. Eger mundai shyǵyndardy B2B operatsiialary boiynsha shegerimge jatqyzýǵa múmkindik berilse, bul durys sheshim bolmaq.
«Eger bul másele qazir sheshilmese, jumysyn áli toqtatpaǵan jáne qyzmetin jalǵastyryp jatqan kásipkerler 2027 jyldyń naýryz aiynda salyq tóleýge qarajat tappai qalýy múmkin. Sebebi olar ońailatylǵan salyq rejimindegi kásipkerlermen jasalǵan mámileler boiynsha tabys salyǵyn tóleýge májbúr bolady», – dep esepteidi Maksim Baryshev.
Sondai-aq sarapshy Salyq kodeksine engizilgen ózgeristerge bailanysty adal jumys istep júrgen 300 myńnan astam kásipkerdiń jabylýy múmkin degen boljamyn taǵy da rastady.
«Ulttyq ekonomika ministrliginde 360 myń kásiporynnyń jabylýy múmkin ekeni týraly málimet aityldy. Olardyń arasynda qyzmetin naqty júrgizbeitin, tek qaǵaz júzinde tirkelgen kásiporyndar bar degen boljam jasaldy. Alaida olardyń qatarynda jyldyq ainalymy shamamen 10 million teńgeni quraityn, qalypty jumys istep turǵan kásiporyndar da bar. Bul – saqtap qalýymyz qajet adal kásipkerler.
Bizdiń oiymyzsha, jańadan on kásiporyn ashylǵansha, jumys istep turǵan úsh kásipkerdi saqtap qalǵan áldeqaida tiimdi. Qazirgi tańda ekonomikada jańa kásiporyndar ashýǵa yntalandyratyn oń belgiler baiqalmaidy.
Jańa biznes ashylǵan kezde ol «ólim alqaby» dep atalatyn kezeńnen ótedi. Ádette, alǵashqy jyldyń ózinde jańadan ashylǵan kásiporyndardyń 80–90 paiyzy jabylyp qalady. Al jumysyn jalǵastyrǵandardyń arasynda kelesi eki jyl ishinde taǵy 50–70 paiyzy qyzmetin toqtatady», – dep túiindedi sarapshy.
