Qazaqstanda mindetti áleýmettik meditsinalyq saqtandyrý (MÁMS) júiesi arqyly jasalatyn keibir kúrdeli otalardyń quny 25 mln teńgege jýyqtaidy. Áleýmettik meditsinalyq saqtandyrý qory 2026 jyldyń qańtar-tamyz ailary aralyǵynda jasalǵan eń qymbat 10 operatsiianyń tizimin jariialady, dep habarlaidy ult.kz Tengrinews.kz-ke silteme jasap.
Quny boiynsha birinshi orynda ókpe transplantatsiiasy tur. Bir naýqasqa jasalǵan mundai otanyń quny 24,8 mln teńge bolǵan. Alaida qor biýdjetine eń kóp salmaq túsirgen operatsiia – júrek defibrilliatorlaryn ornatý. Sebebi bul protsedýradan ótken naýqastar sany kóp.
2026 jyldyń alǵashqy segiz aiyndaǵy eń qymbat 10 operatsiia:
- Ókpe transplantatsiiasy – 24,8 mln teńge. Bir operatsiia jasalǵan.
- Fetaldy diń jasýshalaryn transplantatsiialaý – 17,9 mln teńge. 73 jaǵdai tirkelip, jalpy quny 1,3 mlrd teńge bolǵan.
- Mitraldy qaqpaqshanyń sańylaýyn klipteý – 17,8 mln teńge. 80 operatsiiaǵa 1,4 mlrd teńge jumsalǵan. Bul – júrek qaqpaqshasyndaǵy qannyń keri aǵýyn arnaiy metall qystyrǵysh arqyly toqtatatyn az invazivti ádis.
- Júrek transplantatsiiasy – 11,3 mln teńge. Tórt operatsiia jasalyp, jalpy quny 45,1 mln teńgeni quraǵan.
- Qaitys bolǵan donordan baýyr transplantatsiiasy – 10,4 mln teńge. Úsh operatsiiaǵa 31,3 mln teńge jumsalǵan.
- Aýyr epilepsiia kezinde kezbe júikeni yntalandyrý – 10,2 mln teńge. 37 jaǵdaiǵa 376,5 mln teńge bólingen. Bul ádiste naýqastyń denesine ornatylǵan qurylǵy miǵa elektr impýlstaryn jiberip, ustama jiiligin azaitady.
- Tiri donordan baýyr transplantatsiiasy – 8,8 mln teńge. 23 operatsiianyń jalpy quny 201,6 mln teńge bolǵan.
- Biventrikýliarly defibrilliator implantatsiiasy – 8,7 mln teńge. 680 operatsiiaǵa 5,9 mlrd teńge jumsalǵan. Bul qurylǵy júrek soǵysynyń durys yrǵaǵyn saqtaýǵa kómektesedi.
- Avtomatty kardioverter-defibrilliator implantatsiiasy – 8,7 mln teńge. 1 332 operatsiianyń jalpy quny 11,6 mlrd teńgeni quraǵan. Qurylǵy júrek yrǵaǵyn baqylap, qaýipti aýytqý kezinde elektr impýlsyn beredi.
- Kardioverter-defibrilliatordyń impýls generatoryn aýystyrý – 8,7 mln teńge. 38 jaǵdai tirkelip, jalpy quny 330,8 mln teńge bolǵan.
2025 jyly jaǵdai qalai boldy?
2025 jyldyń qorytyndysy boiynsha eń qymbat operatsiialar reitinginde fetaldy diń jasýshalaryn transplantatsiialaý birinshi orynda turǵan. Bir operatsiianyń ortasha quny 18,3 mln teńge bolǵan. Jalpy 132 operatsiia jasalyp, oǵan 2,4 mlrd teńge jumsalǵan.
Ekinshi orynda mitraldy qaqpaqshanyń sańylaýyn klipteý tur. 54 operatsiianyń árqaisysy orta eseppen 17,3 mln teńgege baǵalanǵan. Al úzdik úshtikti júrek transplantatsiiasy túiindegen. Onyń bireýiniń quny 11,2 mln teńge bolǵan.
Áleýmettik meditsinalyq saqtandyrý qorynyń málimetinshe, joǵary tehnologiialyq meditsinalyq qyzmetterden bólek, qor qarajatynyń basym bóligi statsionarlyq emdeýge, konsýltatsiialyq-diagnostikalyq kómekke jáne aýyl turǵyndaryna meditsinalyq qyzmet kórsetýge jumsalady.
