Qazaqstanda jeke jáne zańdy tulǵalardyń iri kólemde shetel valiýtasyn satyp alý tártibi ózgeredi. Endi belgilengen shekten asqan jaǵdaida valiýtany satyp alýǵa ótinimdi keminde bir jumys kúni buryn berý qajet, dep habarlaidy ult.kz LS-ke silteme jasap.
Qarjy naryǵyn retteý jáne damytý agenttigi tiisti qaýlyǵa 2026 jylǵy 30 qazanda qol qoiǵan.
Kimderge qandai talap qoiylady?
Jańa tártip boiynsha, bir kún ishinde:
- jeke tulǵalardyń valiýta operatsiialary 3 mln dollardan assa;
- zańdy tulǵalardyń operatsiialary 10 mln dollardan assa, qosymsha baqylaýǵa alynady.
Mundai shekke jetkennen keiin shetel valiýtasyn satyp alýǵa beriletin kelesi ótinimder operatsiia jasalatyn kúnnen keminde bir jumys kúni buryn qabyldanady.
Aqsha qaidan kelgeni tekseriledi
Agenttik iri kólemdegi valiýta operatsiialaryn baqylaý kezinde klientterdiń qarajatynyń shyǵý tegin, túpki benefitsiarlaryn, iskerlik bedelin jáne qajetti litsenziialarynyń bar-joǵyn tekseredi.
Sondai-aq buǵan deiin qyzmet kórsetýden bas tartylǵan tulǵalardyń tizimi qaralady. Táýekeli joǵary eldermen jáne ofshorlyq aimaqtarmen bailanysty operatsiialarǵa erekshe nazar aýdarylady.
Sheteldikterge brokerlik shot ashý qiyndaidy
Jańa talaptar shetel azamattarynyń Qazaqstanda brokerlik shot ashýyna da qatysty.
Endi baǵaly qaǵazdar naryǵyna qatysýshylar rezident emes klientterdi muqiiat tekserýge mindetteledi. Bul rette mindetti biometriialyq sáikestendirý jáne qujattardy jan-jaqty tekserý qarastyrylǵan.
Agenttik bul sharalar qylmystyq jolmen alynǵan kiristerdi zańdastyrýǵa qarsy kúreske baǵyttalǵanyn málimdedi.
