Máskeýde Qazaqstan Prezidenti Qasym-Jomart Toqaevtyń qatysýymen Ujymdyq qaýipsizdik týraly shart uiymy (UQShU) Ujymdyq qaýipsizdik keńesiniń kezekti otyrysy ótti. Sammit qorytyndysy boiynsha Armeniiaǵa qatysty uiym jarǵysynyń 25-babyn qoldaný týraly sheshim qabyldandy. Bul bap uiymǵa jarna boiynsha qaryzy bar memleketke daýys berý quqyǵyn shekteýdi kózdeidi, dep habarlaidy ult.kz news.am aqparat portalyna silteme jasap.
UQShU sammitine kimder qatysty?
Jiynǵa Qazaqstan Prezidenti Qasym-Jomart Toqaev, Resei Prezidenti Vladimir Pýtin, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Tájikstan Prezidenti Emomali Rahmon jáne UQShU Bas hatshysy Taalatbek Masadykov qatysty.
Memleket basshylary Uiymnyń 2026 jyly atqarǵan jumysynyń qorytyndysyn talqylap, aldaǵy kezeńdegi basym baǵyttardy aiqyndady. Sondai-aq halyqaralyq jáne óńirlik qaýipsizdik máseleleri jóninde pikir almasty.
Toqaev qandai máselelerge nazar aýdardy?
Qasym-Jomart Toqaev Resei tarapynyń biyl UQShU-ǵa nátijeli tóraǵalyq etkenin atap ótip, Vladimir Pýtinge qonaqjailyǵy úshin alǵys aitty.
Memleket basshysy halyqaralyq terrorizmmen jáne esirtkiniń zańsyz ainalymymen kúreste kúsh-jigerdi biriktirý qajettigin jetkizdi. Sonymen qatar jasandy intellekt tehnologiiasynyń yqpaly artyp kele jatqanyn eskerip, aqparattyq qaýipsizdikti nyǵaitýǵa nazar aýdardy.
Jiyn sońynda Toqaev UQShU-ǵa kelesi tóraǵalyq etetin Tájikstan Prezidenti Emomali Rahmondy quttyqtap, oǵan sáttilik tiledi.
Armeniiaǵa qatysty qandai sheshim qabyldandy?
Kreml saitynda jariialanǵan qujatqa sáikes, UQShU-ǵa múshe elder Armeniiaǵa qatysty uiym jarǵysynyń 25-babyn qoldaný týraly sheshim shyǵarǵan.
Atalǵan bap boiynsha, eger memleket uiym biýdjetine eki jyl boiy jarna tólemese, Ujymdyq qaýipsizdik keńesi oǵan qatysty shekteý engize alady.
Atap aitqanda, bereshegi bar memleket kvotalyq laýazymdarǵa kandidat usyný jáne uiym aiasynda daýys berý quqyǵynan aiyrylady.
Bul shekteýler qaryz tolyq ótelgenge deiin kúshinde bolady.
Aita keteiik, UQShU-ǵa Qazaqstan, Resei, Belarýs, Qyrǵyzstan, Tájikstan jáne Armeniia múshe.
