Atyraý qalasy ákiminiń orynbasary Meiirjan Muqasov qyzmetinen bosatyldy. Buǵan deiin onyń esimi Ulttyq qaýipsizdik komiteti tergep jatqan qylmystyq iske bailanysty atalǵan bolatyn. Qalalyq ákimdiktiń baspasóz qyzmeti sheneýniktiń óz ótinishimen qyzmetinen ketkenin rastady, dep habarlaidy ult.kz.
Osyǵan bailanysty qala ákiminiń jańa orynbasary da taǵaiyndaldy. Endi ishki saiasat, qarjy, ekonomika jáne biýdjetti josparlaý, jumyspen qamtý jáne áleýmettik baǵdarlamalar salalaryna Aidýlat Kenjebekov jetekshilik etedi. Ol buǵan deiin Atyraý oblystyq energetika jáne turǵyn úi-kommýnaldyq sharýashylyq basqarmasyn basqarǵan.
Ailýlat Kenjebekov 1987 jyly Atyraý oblysynda dúniege kelgen. 2008 jyly Halel Dosmuhamedov atyndaǵy Atyraý ýniversitetin «Memlekettik jáne jergilikti basqarý» mamandyǵy boiynsha támamdaǵan.
Eńbek jolyn sol jyly oblystyq energetika jáne kommýnaldyq sharýashylyq basqarmasynda josparlaý-shart bóliminiń bas mamany mindetin atqarýshy bolyp bastaǵan. Keiin osy mekemede bas maman, bólim basshysy jáne basqarma basshysynyń orynbasary qyzmetterin atqardy.
2019–2022 jyldary Qyzylqoǵa aýdany ákiminiń orynbasary boldy. Al 2022 jyldyń jeltoqsanynan jańa qyzmetke taǵaiyndalǵanǵa deiin oblystyq energetika jáne turǵyn úi-kommýnaldyq sharýashylyq basqarmasyn basqardy.
Eske salaiyq, buǵan deiin UQK Atyraý qalasy ákiminiń eki orynbasary – Meiirjan Muqasov pen Tilek Mahýovqa qatysty tergeý júrgizilip jatqanyn rastaǵan edi.
Qyrkúiek aiynda Atyraý qalasynyń ákimi Shákir Keikin de qyzmetinen ketken bolatyn. Keiin qala basshysy bolyp «Atyraý» áleýmettik-kásipkerlik korporatsiiasynyń burynǵy basshysy Daniiar Tahanov taǵaiyndaldy.
