Qazaqstan ǵylymyndaǵy aýdit 51 mlrd teńgeniń qarjylyq buzýshylyǵyn anyqtady. Sonymen qatar 47 mlrd teńge tiimsiz josparlanyp, paidalanylǵan, 16 mlrd teńge shyǵyn men jiberip alǵan paida tirkelgen. Bul týraly Joǵary aýditorlyq palata tóraǵasy Álihan Smaiylov Quryltai otyrysynda málimdedi, dep habarlaidy ult.kz.
Onyń aitýynsha, ǵylymi zertteýler men tájiribelik-konstrýktorlyq jumystarǵa arnalǵan qarjynyń bir bóligi ǵylymǵa jumsalmaǵan. Máselen, Astana Hub-taǵy 43 mlrd teńgeniń 23 mlrd teńgesi baǵaly qaǵazdarǵa salynsa, «Samǵaýdyń» 15 mlrd teńgesiniń 10 mlrd teńgesi depozitter men REPO operatsiialaryna ornalastyrylǵan. Bul operatsiialardan túsken tabys 14 mlrd teńgeden asqan.
Al ǵylymi jobalardy iske qosý 215 kúnnen 2,5 jylǵa deiin keshiktirilgen. Buǵan qosa, jalpy quny 32 mlrd teńge bolatyn 159 joba tolyqqandy memlekettik esepten tys qalǵan.
«147 kelisimshart boiynsha 9 mlrd teńgege jýyq bereshek anyqtaldy. Onyń 3 mlrd teńgesi talap qoiý merziminiń ótýine bailanysty biýdjetke túspeidi», – dedi Álihan Smaiylov.
Aýdit nátijesinde 51 mlrd teńgeniń 37,7 mlrd teńgesi qalpyna keltirilgen. Qalǵan qarajatty 2027 jyldyń birinshi toqsanynda qaitarý josparlanyp otyr.
Joǵary aýditorlyq palatanyń múshesi Nurlan Nurjanovtyń aitýynsha, eki adam tártiptik jaýapkershilikke tartylyp, tórt laýazymdy tulǵa qyzmetinen bosatylǵan. Taǵy 32 adamǵa ákimshilik jaýapkershilik qaralǵan. Úsh material quqyq qorǵaý organdaryna joldanǵan.
Ǵylym jáne joǵary bilim ministri Saiasat Nurbek Ǵylym komitetiniń tóraǵasy, Ulttyq saraptama jáne ǵylymi-tehnikalyq aqparat ortalyǵy men Ǵylym qorynyń basshylary qyzmetinen bosatylǵanyn habarlady.
Aýdit qorytyndysy boiynsha Úkimetke bes usynym, al tekserilgen mekemelerge 66 tapsyrma berildi.
