Atyraýda azamattyq nekedegi jubaiyn óltirdi dep aiyptalǵan Ersinbek Jumaǵalievtiń soty jalǵasyp jatyr. Ol jasaǵan isine ókinetinin aitqanymen, qylmysqa áieliniń ózi sebep bolǵanyn alǵa tartty. Al marqumnyń týystary aiyptalýshyny ómir boiyna bas bostandyǵynan aiyrýdy talap etýde, dep habarlaidy ult.kz.
KTK arnasynyń málimetinshe, qaiǵyly oqiǵa biyl 22 shildede bolǵan. Tergeý nusqasy boiynsha, er adam azamattyq nekedegi jubaiyna pyshaq jaraqatyn salyp, oqiǵa ornynan ketip qalǵan. Artynda úsh jasar qyzy qalǵan. Sábi bir táýlikten astam ýaqyt boiy anasynyń máiitiniń janynda jalǵyz bolǵan.
Sotta sarapshy marqumnyń denesindegi kóptegen jaraqat týraly baiandady. Al sottalýshy janjalǵa aqsha, aliment jáne nesie máseleleri sebep bolǵanyn aityp, áieliniń ózine pyshaqpen umtylǵanyn málimdedi.
Alaida ol sýdianyń basty saýalyna jaýap bere almady. Sýdia Zarema Hamidýllina úsh jasar qyzyn nege anasynyń janynda qaldyryp ketkenin birneshe ret surady.
Marqumnyń anasy sottalýshynyń qyzyna kiná artyp, jaýapkershilikten jaltaryp otyrǵanyna narazylyǵyn bildirdi.
«Ólgen adamǵa bárin jaýyp tur. "Ólgen adam sóilei almaidy" dep oilaidy ǵoi. Óziniń basyn alyp qashyp otyr. Ol tipti balany da oilap turǵan joq», – dedi Qatima Shymyrova.
Marqumnyń týystary sottan Ersinbek Jumaǵalievke ómir boiyna bas bostandyǵynan aiyrý jazasyn taǵaiyndaýdy surap otyr.
Almagúl Shymyrova 37 jasta bolǵan. Ol tórt balanyń anasy. Marqum men sottalýshy alty jyl azamattyq nekede turǵan.
