Qazaqstandyq stýdentter diplomdyq jáne ǵylymi jumystardy jazý kezinde jasandy intellektini paidalana alady. Alaida JI stýdenttiń óz oiyn, taldaýy men qorytyndysyn almastyrmaýy kerek. Bul týraly Ǵylym jáne joǵary bilim ministri Saiasat Nurbek OKQ-de ótken baspasóz máslihatynda málimdedi, dep habarlaidy ult.kz.
Ministrdiń aitýynsha, jasandy intellektini stýdenttik jáne ǵylymi jumystarda belgili bir talaptardy saqtai otyryp qoldanýǵa ruqsat etiledi.
«Birinshiden, stýdent nemese zertteýshi óz qorytyndysyn jasaýy tiis analitikalyq bólimderdi, tujyrymdar men qorytyndylardy jazý kezinde algoritmderdi qoldanýǵa bolmaidy. Ekinshiden, jasandy intellekt nemese algoritmderdiń nátijelerin paidalanǵan jaǵdaida mindetti túrde oǵan silteme jasaý qajet. Iaǵni, belgili bir bólimdi qandai algoritmniń kómegimen daiyndaǵanyn, onyń derekterdi qalai óńdep, qandai nátije bergenin kórsetý kerek», – dedi ministr.
Sondai-aq stýdenttik jumystarda jasandy intellektini qoldanýdyń ruqsat etilgen kólemin ár joǵary oqý orny óz betinshe belgileidi.
Saiasat Nurbektiń sózinshe, búginde álem elderiniń bilim berý júieleri jasandy intellektini qoldaný men stýdentterdiń derbes jumys isteýi arasyndaǵy tepe-teńdikti izdep jatyr.
Osyǵan bailanysty Ǵylym jáne joǵary bilim ministrligi test ázirleý salasyndaǵy halyqaralyq kompaniialardyń biri ETS-pen birlesip, testileýdiń jańa formatyn daiyndap jatyr.
Jańa test bilim deńgeiimen qatar, logikalyq oilaýdy, oilaý júiesiniń qurylymyn, tsifrlyq saýattylyqty jáne jeke tulǵanyń keibir qasietterin baǵalaýǵa múmkindik beredi. Ministrdiń aitýynsha, testileýdiń jańa formatyn kelesi jyly pilottyq rejimde iske qosý josparlanyp otyr.
