Qazaqstannyń aviatsiialyq ákimshiligi áýe jolaýshylaryn beitanys adamdardyń sálemdemesi men júgin tasymaldaýǵa kelispeýge shaqyrdy. Mundai áreket zań buzýshylyqqa, tipti qylmystyq jaýapkershilikke ákelýi múmkin, dep habarlaidy ult.kz.
«Zań men Tártip» qaǵidaty aiasynda vedomstvo áýejaida árbir jolaýshy qaýipsizdik talaptaryn saqtaýǵa jaýapty ekenin eske saldy.
Málimetke sáikes, qaskóiler jolaýshylarǵa belgili bir aqy usynyp, konvert, sálemdeme nemese bagajdy basqa qalaǵa ne shetelge jetkizip berýdi suraýy múmkin. Syrttai qaraǵanda mundai ótinish ziiansyz kóringenimen, onyń ishinde tyiym salynǵan zattar bolýy yqtimal.
Sondyqtan ishindegi zattardyń ne ekenin bilmeitin sálemdemelerdi tasymaldaýǵa kelispegen jón. Bul talap tipti tanystar arqyly túsken nemese aqshalai syiaqy usynylǵan jaǵdaida da saqtalýy kerek. Sondai-aq jeke zattardy qaraýsyz qaldyrmaý jáne bógde adamdarǵa bagajdy paidalanýǵa múmkindik bermeý qajet.
Ásirese halyqaralyq reisterde saq bolǵan mańyzdy. Memlekettik shekara arqyly taýarlar men qundylyqtardy zańsyz ótkizý kontrabanda retinde saralanyp, birneshe jylǵa deiin bas bostandyǵynan aiyrý jazasyna ákep soǵýy múmkin.
Kúdik týdyratyn zattardy baiqasańyz nemese bógde adamdardyń sálemdeme tasymaldaýǵa qatysty kúmándi usynysyn alsańyz, dereý politsiiaǵa nemese áýejaidyń aviatsiialyq qaýipsizdik qyzmetine habarlaý qajet.
Aviatsiialyq ákimshilik jolaýshylardy qyraǵylyq tanytyp, belgisiz júkterdi tasymaldaý arqyly qylmystyq áreketke baiqamai aralasyp ketpeýge shaqyrdy.
