Belgili ánshi-kompozitor, Qazaqstannyń eńbek sińirgen ártisi Marat Omarov jastardy shetelge shyǵyp, jańa múmkindikterdi paidalanýǵa shaqyrdy, dep habarlaidy ult.kz.
Óner iesi Aman Tasyǵannyń "TalkLike" podkastyna bergen suhbatynda Amerikadaǵy bes jyldyq ómiri týraly aityp, jastardyń bolashaǵyna qatysty oiyn ortaǵa saldy.
Ánshiniń pikirinshe, jas kezde shetelge baryp, ózge eldiń tynys-tirshiligin kórý adamnyń oi-órisin keńeitip, ómirden óz ornyn tabýyna kómektesedi.
"Jastarǵa mindetti túrde Amerikaǵa barý kerek. Birinshi jyly qinalar, ekinshi jyly ózin taýyp ketedi. Mindetti túrde óner adamy bolý shart emes. Biznes, IT nemese til mamany bolsyn. Til bilgenniń ózi – 70-80 paiyz múmkindik. Sonyń arqasynda ary qarai alyp ketedi", – dedi Marat Omarov.
Ánshi Amerikadaǵy ómirdiń syrt kózge kóringendei ońai emes ekenin de jasyrmady. Onyń aitýynsha, ol jaqta ár adam óz kúnin ózi kórip, qiyndyqty eńserýge úirenedi.
"Amerikada seniń jaǵdaiyńdy eshkim jasap bermeidi. Orǵa túsirip tastaǵandai boldym. Jan-jaǵyma jaltaqtap qaradym, kómektesetin eshkim joq. Tipti arqan da joq. Ózińdi óziń alyp shyǵýyń kerek. Siz tabys kózi týraly surap jatyrsyz ǵoi. Taba alady, ol jerde qalmaidy. Tipti til bilmeitinderdi de kórdim. Eń bastysy, jalqaý bolmasa boldy", – dedi óner iesi.
Marat Omarov qazirgi jastardyń shetelge shyǵýǵa múmkindigi bola tura, ony paidalanbai júrgenine tańǵalatynyn aitty. Ol jastyq shaqty tek úirenshikti ortada ótkizbei, jańa el kórip, túrli salada baq synaýǵa keńes berdi.
"Búgin osynda júrgen balalardy kórip tańǵalamyn. Ne istep júr dep oilaimyn. Ushý kerek senderge! Baryp kórseńdershi. Koreiaǵa da baryp jatyr ǵoi. Bar, jas kezińde ózińdi tap. Bizdiń kezimizde ondai múmkindik bolǵan joq. Keńes Odaǵy kezinde "uiat bolady", "úitpe-búitpe" degen túsinik boldy", – dep oiyn túiindedi ánshi.
Osylaisha, bes jyl Amerikada ómir súrgen Marat Omarov jastarǵa tek diplommen shektelmei, til úirenip, eńbek etip, ózge elden tájiribe jinaýdyń mańyzyn jetkizdi. Onyń pikirinshe, adamnyń alǵa basýyna eń aldymen eńbekqorlyǵy men táýekelge bara bilýi yqpal etedi.
Marat Omarov kim?
Marat Omarov – qazaqtyń belgili ánshi-kompozitory, Qazaqstan Respýblikasynyń eńbek sińirgen ártisi. Ol 1959 jyly 16 sáýirde Túrkistan oblysy Sozaq aýdanynyń Sholaqqorǵan aýylynda dúniege kelgen.
Ál-Farabi atyndaǵy Mádeni-aǵartý institýtyn támamdap, eńbek jolynda Shymkent oblystyq filarmoniiasynyń "Aýylym – ánim" ansamblinde ánshi, Qazaq televiziiasynda mýzykalyq redaktor bolyp qyzmet atqarǵan.
Onyń "Anashym", "Áke armany", "Alǵashqy mahabbat", "Qyz syny", "Syńarym", "Ánshi balapan" siiaqty ánderi halyq arasynda keńinen tanylǵan.
Kompozitor "Jiger-87", "Aziia daýysy-95", "Altyn disk-97" jáne basqa da halyqaralyq óner baiqaýlarynyń laýreaty atanǵan.
2001 jyldan bastap Astanadaǵy Prezident orkestri men filarmoniiada qyzmet etken. Keiingi jyldary AQSh-tyń Los-Andjeles qalasynda turyp, shyǵarmashylyq jumysyn jalǵastyrǵan.
