Kei ánniń alǵashqy áýeni estilgennen-aq ony oryndaǵan ánshi oiǵa oralady. Arada qansha jyl ótse de, tyńdarman sol týyndyny izdep tyńdap, kontsertte de sony suraidy. Toqsanynshy jyldary sahnaǵa shyqqan nemese sol kezeńde keń tanylǵan birqatar ónerpazdyń shyǵarmashylyǵynda osyndai orny bólek ánder bar, dep habarlaidy ult.kz.
Zarina Omarova - “Jan gúlim”
Zarina Omarova degende kópshiliktiń esine aldymen “Jan gúlim” túsedi. 1994 jyly jaryq kórgen týyndynyń áýenin Marat Omarov, sózin Serik Turǵynbekuly jazǵan. Zarina ándi alǵash jańa jyldyq baǵdarlamada, keiin ákesiniń Respýblika saraiyndaǵy kontsertinde oryndaǵanyn aitqan.
Ánshiniń óz sózine qaraǵanda, osy týyndy onyń shyǵarmashylyǵynyń basty hitine ainalǵan. Toiǵa shaqyrǵan jurt ta mindetti túrde “Jan gúlimdi” suraǵan. Zarina suhbatynda bul ánniń ózine tanymaldyqpen birge mol tabys ákelgenin de jasyrmaǵan.
Sáken Qalymov - “Altaidyń ar jaǵynan kelgen arý”
Sáken Qalymovty tyńdarmanǵa keń tanytqan týyndy — “Altaidyń ar jaǵynan kelgen arý”. Sózi men áýenin Tynyshbai Raqym jazǵan án 1993 jyly “Kesh jaryq” baǵdarlamasynda oryndalǵan.
Syrttai qaraǵanda ǵashyqtyq týraly shyǵarma bolyp estilgenimen, onyń astarynda alystaǵy aǵaiynǵa degen saǵynysh, atamekenge shaqyrý saryny jatyr. Sákenniń oryndaýyndaǵy án toqsanynshy jyldary keń tarap, onyń esimimen qatar atalatyn týyndyǵa ainaldy.
Merýert Túsipbaeva - “Qimai seni baramyn”
Merýert Túsipbaevanyń shyǵarmashylyǵynda “Qimai seni baramyn” ániniń orny bólek. Áýenin Tólegen Muhamedjanov, sózin Shómishbai Sariev jazǵan týyndy ánshini qalyń tyńdarmanǵa tanytty.
Merýert suhbattarynyń birinde beinebaiannyń 1995 jyly shyqqanyn aitqan. Onyń esteliginshe, beinejazbany Qytaidan kelgen bir qazaq jigiti alyp ketip, sol jaqtaǵy qandastarǵa taratqan. Sonyń arqasynda ánshi 1996 jyly Qytaidaǵy qazaqtarǵa da keńinen tanylǵan.
Qanat Ibragimov - “Seniń kóziń”
Búginde “Seniń kóziń” ánin kópshilik “MýzART” arqyly biledi. Alaida onyń áýenin jazyp, alǵash ózi oryndaǵan ónerpaz — Qanat Ibragimov. Sazgerdiń aitýynsha, án 1989 jyly týǵan. Al 1993 jyly ol týyndyny “Kesh jaryq” baǵdarlamasynda Muqaǵali Maqataevtyń óleńimen shyrqaǵan.
2001 jyly ándi “MýzART” repertýaryna engizdi. Qanat keiingi suhbatynda “Seniń kóziń” óziniń sazger retindegi tólqujatyna ainalǵanyn aitqan. Osylaisha, toqsanynshy jyldary efirge shyqqan týyndy keiin jańa oryndaýshylar arqyly keń tarady.
Madina Saǵynbekova - “Unatamyn men seni”
Madina Saǵynbekovany tyńdarmanǵa tanytqan týyndylardyń biri — Tabyldy Dosymovtyń “Unatamyn men seni” áni. Ánshi týraly jariialanǵan suhbatta ol dál osy shyǵarmany oryndaýy arqyly tanylǵan ónerpaz retinde tanystyrylady.
Madinanyń óner joly toqsanynshy jyldardaǵy án baiqaýlarynan bastalǵan. Ol 1994 jyly Shámshi Qaldaiaqov atyndaǵy respýblikalyq baiqaýda bas júlde alǵanyn aitqan. Keiin jeke ánjinaǵyn da “Unatamyn men seni” dep ataǵan. Degenmen týyndynyń onyń oryndaýynda naqty qai jyly taraǵany suhbatta kórsetilmeidi.
Bul oryndaýshylardyń basqa da ánderi bar. Munda olardyń shyǵarmashylyq jolynda erekshe oryn alyp, tyńdarman jadynda esimimen qatar saqtalǵan týyndylar sóz boldy.
