Belgili ánshi, aktrisa, Qazaqstannyń eńbek sińirgen qairatkeri Janar Aijanova ekinshi kúieýimen eki jaqqa ketýine ne sebep bolǵanyn aityp, jeke ómirine qatysty syr bólisti, dep habarlaidy ult.kz.
Óner iesi "Mamskii áńgime" podkastyna bergen suhbatynda 20 jyl otasqan jubaiymen ajyrasý týraly sheshimge qalai kelgenin áńgimeledi. Onyń aitýynsha, ekeýiniń arasynda ortaq bala bolmaǵan. Bul jaǵdai ánshini uzaq ýaqyt oilandyryp, aqyrynda nekesin buzýǵa sebep bolǵan.
Janar Aijanova qyzy Aijuldyz dúniege kelgennen keiin taǵy da perzent súiip, onyń baýyry bolǵanyn armandaǵanyn aitty. Alaida ekinshi ret turmys qurǵanymen, bul tilegi oryndalmaǵan.
"Aijuldyzdan keiin artynan sińlisi ne inisi bolsa eken dep tiledim. Jalǵyz bolmasa eken dep oiladym. Keiin turmysqa shyqtym, biraq buiyrmady. Ekinshi kúieýimmen 20 jyl birge turdyq", – dedi ánshi.
Aktrisanyń sózinshe, ajyrasý týraly oi bir kúnde paida bolmaǵan. Ol bul máseleni kópten beri oi eleginen ótkizip júrgen. Al qyzy Aijuldyz turmysqa shyqqan soń, óz ómirine qatysty mańyzdy sheshim qabyldaǵan.
"Birazdan beri solai oilap júrgenmin. Aramyzda bala bolmady. Ádette kináni áielden izdeimiz ǵoi. Sondyqtan onyń obalyna qalmaiyn dep, bir kúnde sheshim qabyldap, eki jaqqa kettik", – dedi óner iesi.
Janar Aijanova burynǵy kúieýiniń ózine deiin shańyraq kótermegenin de jasyrmady. Sondyqtan onyń áke atanýyna kedergi bolǵysy kelmegen. Ánshi ortaq balalary bolmaǵany úshin ainalasyndaǵylardyń ózin kinálaǵanyn da eske aldy. Degenmen óner iesi burynǵy jaryna esh ókpesi joq ekenin, kerisinshe, onyń otbasyn quryp, balaly bolǵanyn shyn júrekten qalaitynyn jetkizdi.
"Ekiniń biri menen kórdi. Kórse, kóre bersin. Men áli kúnge deiin sol kisi balaly bolsa eken dep tileimin. Bireýge qastyq oilap, jaqsylyqqa jetpeisiń. Ol – óte jaqsy azamat. Bári Allanyń qolynda. Bizge ortaq bala buiyrmady, al men onyń obalyna qalǵym kelmedi", – dedi aktrisa.
Ánshi ajyrasqannan keiin burynǵy kúieýimen aradaǵy syilastyqtyń joǵalmaǵanyn da aitty. Qazir ekeýi burynǵydai aralaspaǵanymen, qajet kezde habarlasyp turady.
"Búginde aralaspaimyz, biraq sálemimiz túzý. Jaqynda bir sharýaǵa bailanysty sóilestik. Onda turǵan ne bar? Eresek adamdarmyz", – dep túiindedi Janar Aijanova.
