Pavlodar oblysynda tanysyn qatygezdikpen óltirip, qylmys izin jasyrý úshin máiitin órtegen er adamǵa sot úkimi shyqty. Aqsý qalasynda bolǵan aýyr qylmysqa aiypty dep tanylǵan azamat 10 jylǵa bas bostandyǵynan aiyryldy, dep habarlaidy ult.kz.
KTK arnasynyń málimetinshe, oqiǵa biyl sáýir aiynda Aqsý qalasynda bolǵan. Temirjol jelisine jaqyn ornalasqan jylý trassasynyń mańynan jas áieldiń jartylai órtengen denesi tabylǵan. Quqyq qorǵaý organdary kóp uzamai kúdiktini anyqtap, ustady. Ol marqumnyń tanysy bolyp shyqqan.
Tergeý materialdaryna súiensek, qaiǵyly oqiǵaǵa tanystar arasyndaǵy janjal sebep bolǵan. Sotta er adam áieldiń anasyna til tigizgenin aityp, onymen sózge kelgenin jetkizgen. Alaida janjal sońy aýyr qylmysqa ulasqan. Ol áieldiń betinen judyryqpen uryp, jerge qulaǵan soń tepkilegen. Jábirlenýshiniń qaitys bolǵanyna kózi jetkennen keiin úiine baryp, soliarka alyp kelip, máiitti órtegen.
Sot otyrysynda aiyptalýshy óz kinásin moiyndamai, aqtaýdy suraǵan. Degenmen tergeý barysynda jinalǵan dálelder onyń qylmysqa qatysyn tolyq rastaǵan.
Sýdia Janna Nyǵybaevanyń aitýynsha, is boiynsha usynylǵan aiǵaqtar bir-birinen táýelsiz derekkózderden alynǵan. Onyń ishinde jasyryn tergeý áreketteriniń beinejazbalary da bar. Jazbalarda sottalýshynyń jedel ýákildermen áńgimelesý kezinde buǵan deiin bergen jaýaptaryndaǵy málimetterdi qaitalaǵany tirkelgen.
Eske salaiyq, kóktemde Aqsý mańynan tabylǵan áieldiń órtengen denesi túsirilgen video áleýmettik jelilerde taraǵan edi. Sol kezde marqumnyń denesi oblystaǵy ónerkásip kásiporyndarynyń birinen shamamen úsh shaqyrym jerden tabylǵany habarlanǵan bolatyn.
