Saiasattanýshy Daniiar Áshimbaev Prezident Qasym-Jomart Toqaevtyń «Samuryq-Qazyna» qory men «Qazaqstan temir joly» basshylarynyń ustalýyna bailanysty jasaǵan málimdemesine pikir bildirdi, dep habarlaidy ult.kz.
Sarapshy Memleket basshysynyń «tergeý endi ǵana bastaldy» degen sózderine nazar aýdaryp, sybailas jemqorlyqqa qarsy kúrestiń odan ári qalai órbýi múmkin ekenin atap ótti.
Áshimbaev óziniń áleýmettik jelidegi jazbasynda Toqaevtyń Qaýipsizdik keńesiniń otyrysyndaǵy sózin taldaǵan. Onyń paiymdaýynsha, Prezidenttiń málimdemesindegi eń mańyzdy tustardyń biri - tergeýdiń áli bastapqy kezeńde ekeni týraly eskertýi.
«Eger tergeý iri memlekettik holdingtiń basshysynan bastalsa, al sybailas jemqorlyqpen kúres týraly qatań málimdemeler kúsheiip jatsa, bul tergeý qai baǵytqa deiin jetýi múmkin? Bul – óte qyzyqty suraq», – dep jazdy saiasattanýshy.
Sarapshy Prezidenttiń jemqorlyqqa qatysty isterde eshkimge artyqshylyq berilmeitini týraly málimdemesine de toqtaldy. Qasym-Jomart Toqaev memlekettik qyzmette júrgen adamdardy «Ózimizdiki» jáne «Ózimizdiki emes», tipti «bóten» dep bólýge múlde bolmaitynyn aitqan edi. Memleket basshysy Konstitýtsiiada barlyq azamattyń zań aldyndaǵy teńdigi qaǵidaty bekitilgenin eske saldy.
Áshimbaevtyń pikirinshe, Prezidenttiń bul eskertýi nazar aýdarýǵa turarlyq. Ol ustalǵan tulǵalarǵa qatysty ártúrli pikirler men ótinishter bolǵan bolýy múmkin ekenin aityp, Memleket basshysy osy máselege qatysty ustanymyn ashyq bildirgenin atap ótti.
Saiasattanýshy áleýmettik jelilerde ulttyq qaýipsizdik organdarynyń áreketi memlekettik institýttardyń bedeline, kvazimemlekettik sektordyń imidjine jáne iri investitsiialyq jobalarǵa keri áser etýi múmkin degen pikirler aitylǵanyn da eske saldy.
Alaida Áshimbaev mundai kózqaraspen kelispeidi. Onyń jazýynsha, eldiń halyqaralyq bedeline jemqorlyqpen kúres emes, jemqorlyqtyń ózi nuqsan keltiredi.
«Eldiń imidjine jemqorlardy ustaý emes, jemqorlardyń ózi nuqsan keltiredi. Olar uialýy kerek», – dep atap ótti sarapshy.
Áshimbaev Prezidenttiń jańa tarihi kezeń týraly sózderine de nazar aýdarǵan. Toqaev eldiń burynǵy jetistikterine toqmeiilsip, bir orynda turýǵa bolmaitynyn aitqan edi. Memleket basshysy jalqaýlyq pen nemqurailylyqtyń Ádiletti Qazaqstandy qurý jolyndaǵy serik bola almaitynyn jetkizdi.
Saiasattanýshynyń paiymdaýynsha, sońǵy ýaqytta Prezidenttiń saiasi ustanymy men ritorikasynda jańa saryndar baiqalady. Onyń aitýynsha, Memleket basshysy qoǵamdaǵy nemqurailylyq, masyldyq, mádenietsizdik, popýlizm, quqyqtyq nigilizm, ádiletsizdik jáne sybailas jemqorlyq siiaqty keleńsiz qubylystardy synǵa alyp keledi.
«Prezidenttik filosofiia men ritorika únemi ózgerip, damyp otyrady. Onda sońǵy birneshe onjyldyqta Qazaqstan biliginiń sóz qoldanysynda kezdespegen jańa ári qyzyqty saryndar paida bolýda», – dep jazdy Daniiar Áshimbaev.
Sarapshy Prezidenttiń sybailas jemqorlyqqa qarsy kúres máselesinde tabandylyq tanytyp otyrǵanyn atap ótti. Onyń pikirinshe, jańa Konstitýtsiiada ádilettilik pen zańdylyq qundylyqtarynyń bekitilýi memlekettik saiasattaǵy osy baǵyttyń mańyzyn arttyra túsken.
Áshimbaev jazbasyn Qasym-Jomart Toqaevtyń qazirgi jaǵdaida sheshimdi ári tabandy ustanym tanytyp otyrǵanyn atap ótýmen qorytyndylady.
Aita keteiik, 13 qarashada Prezident Qasym-Jomart Toqaev Qaýipsizdik keńesiniń jedel otyrysyn ótkizip, «Samuryq-Qazyna» AQ basqarma tóraǵasy Nurlan Jaqypov pen «Qazaqstan temir joly» ulttyq kompaniiasynyń basshysy Eljas Otyshievtiń ustalýyna qatysty málimdeme jasady. Memleket basshysy Úkimet pen baqylaýshy organdarǵa kvazimemlekettik sektordaǵy sybailas jemqorlyq quqyqbuzýshylyqtaryn azaitý jóninde naqty usynystar ázirleýdi tapsyrdy.
