Elordadaǵy Ulttyq akademiialyq kitaphanada «Egemen Qazaqstan» gazetiniń «Sanatker ult» jobasy aiasyndaǵy kezekti dóńgelek ústel ótti. Memleket basshysy Qasym-Jomart Toqaevtyń jańa qoǵamdyq etika qalyptastyrý bastamalaryn nasihattaý maqsatynda uiymdastyrylǵan basqosýǵa «Jańa qoǵamdyq sana: ádep, tártip, jaýapkershilik» taqyryby arqaý boldy.
Jiynǵa moderatorlyq etken Prezident keńesshisi Baýyrjan Omaruly dóńgelek ústeldiń kirispesinde jańa qoǵamǵa bet burǵan soń, jańa qundylyqtardyń ornyǵýy – zańdy nárse ekenin jetkizdi.
«Búgin tilimizge tiek bolyp otyrǵan jańa etika máselesi de – sonyń quramdas bóligi. Ózderińiz bilesizder, jańa turpatty memleket, sapaly ult degen uǵymdar bizdiń ómirimizge dendep ene bastady. Túrkistandaǵy jiynda Memleket basshysy: «Elimizde jańa qoǵamdyq etika qalyptasýy kerek. Onda eldiń birligi men turaqtylyǵy, azamattardyń ózara tilektestigi, ádildik, zań men tártip, senim men jaýapkershilik siiaqty qundylyqtar ústemdik qurýy qajet», dep naqty mindet qoidy. Muny baǵdarlamalyq mindet deýge bolady», dep atap ótti B.Omaruly.
Is-sharaǵa qatysqan belgili memleket jáne qoǵam qairatkerleri, Quryltai depýtattary Únzila Shapaq, Janarbek Áshimjan, Dáýlet Káribek, jazýshy-dramatýrg, pýblitsist Jabal Erǵaliev, Qazaqstan Halyq Keńesiniń músheleri Tabiǵat Zeinulqabden, Tólegen Kúnádilov, Natalia Dementeva, Qazaqstan qoǵamdyq damý institýty Institýtsionaldy taldaý jáne reformalar ortalyǵynyń direktory Rizzat Tasym, Prezident janyndaǵy Ortalyq kommýnikatsiialar qyzmetiniń bas sarapshysy Jandar Asan, L.N.Gýmilev atyndaǵy EUÝ filosofiia kafedrasynyń professory Raýan Kemerbai keleli oi-tujyrymdaryn ortaǵa saldy.
Atap aitqanda, «Zań men tártip» qaǵidatynyń ornyǵýy, jańa qoǵamdyq sana qalyptastyrý, jastar tárbiesi, «Taza Qazaqstan» ideiasynyń mańyzy, tsifrlyq qarym-qatynas mádenieti sekildi ózekti taqyryptar boiynsha pikir almasyp, utymdy usynystaryn aitty.
«Dóńgelek ústel» týraly tolyq aqparatty «Egemen Qazaqstan» gazetiniń búgingi nómirinen oqi alasyzdar.
