Қазақстанда туристік бизнесті қолдау шараларына 2026 жылдың тамызында бірқатар өзгеріс енгізілді. Жаңа талаптар кәсіпкерлерге қойылатын шарттарды нақтылауға, рәсімдерді жеңілдетуге және бюджет қаражатының тиімді жұмсалуын қамтамасыз етуге бағытталған, деп хабарлайды ult.kz.
«Kids Go Free» бағдарламасы
Бағдарлама аясында туристік өнімді ішкі туризм саласындағы туроператорлар қалыптастыруы керек. Оның құрамына:
- кәмелетке толмаған жолаушының бару және қайту бағытындағы эконом-класты әуе билеттері;
- туристерді орналастыру орындарында кемінде екі түн болу қызметі кіреді.
Келу туризміне берілетін субсидия
Шетелдік турист Қазақстанда кемінде алты түн болған жағдайда туроператорға әр турист үшін 15 мың теңге субсидия төленеді. Бұл шара шетелдік қонақтардың елде болу мерзімін ұзартуға және өңірлердегі туристік қызметтерге сұранысты арттыруға бағытталған.
Туристік инфрақұрылымға жұмсалған шығын өтеледі
Кәсіпкерлерге арналған қолданыстағы мемлекеттік қолдау шаралары сақталды. Атап айтқанда:
- тау шаңғысы курорттарына арналған техника мен жабдықтарды, туристік автобустарды сатып алу шығынының 25%-ы өтеледі;
- жол бойындағы сервис нысандарын, туристік ақпараттық орталықтар мен туристерді орналастыру орындарын салу шығынының 10%-ы өтеледі.
Санитариялық тораптарға субсидия сақталды
Санитариялық-гигиеналық тораптарға ай сайын берілетін 83,3 мың теңге көлеміндегі субсидия бұрынғыдай төленеді. Сонымен қатар олардың тұрақты жұмыс істеуі мен қызмет көрсету сапасына мониторинг жүргізіледі.
Басым туристік аумақтарды өңірлер анықтайды
Енді өңірлер өздерінің ерекшеліктері мен туристік әлеуетін ескере отырып, басым туристік аумақтарды өздері айқындай алады. Бұл туристік әлеуеті жоғары жерлерді дамытуға мүмкіндік береді.
