Фото: Oimaqnews.kz
2025 жылы Қазақстан ұлы ақын, философ, ойшыл және реформатор Абай Құнанбайұлының 180 жылдығын атап өтеді. Бұл мерейтой тек ресми іс-шара ғана емес, ұлттық мәдениетке, рухани тамырға және қазақ зияткерлік дәстүріне терең бойлайтын маңызды күнге айналмақ, деп хабарлайды Ult.kz.
Ақынның 180 жылдығына орай республика көлемінде ауқымды дайындық жұмыстары жүргізілуде. Мәдени іс-шаралармен қатар, оқу орындарында Абайтану сабақтары өткізіледі. Білім беру саласында «Абай оқулары» республикалық циклі ұйымдастырылып, Абайтану курсы оқу бағдарламасына кеңінен енгізіледі. Бұл бастама арқылы жас ұрпаққа ақынның ой-өрісі мен рухани мұрасын тереңірек сіңіру көзделіп отыр.
Мерейтой аясында Астана мен Алматыда халықаралық ғылыми конференциялар өтеді. Шараларға Орталық Азия, Түркия, Ресей және Еуропадан ғалымдар қатысып, Абай идеяларының бүгінгі күнмен үндестігін талқылайды. Сонымен қатар еліміздің ірі театрларында Абайға арналған қойылымдар, опералар мен балеттер сахналанады. Алматыдағы Абай атындағы ұлттық опера және балет театры әйгілі «Абай» операсын қайта жаңғыртып, поэзиялық-музыкалық кештер өткізуді жоспарлап отыр.
Еліміздің барлық өңірлерінде жәрмеңкелер, көрмелер, концерттер мен флешмобтар өтеді. Астананың орталығында Абай бейнесіне арналған заманауи интерактивті инсталляция орнатылады. Ұлы ақын дүниеге келген Абай облысы – осы жылдың рухани орталығына айналмақ. Семей қаласы мен Жидебайда жөндеу және жаңғырту жұмыстары жүргізіліп, жаңа экспозициялар ашылады. Мұнда кең ауқымды «Абай форумы» да ұйымдастырылады. Сонымен қатар «Абай жолымен» атты туристік жоба жүзеге асырылып, ақынның өмірі мен шығармашылығы арнайы бағыттар, фильмдер, подкасттар мен мобильді қосымшалар арқылы таныстырылады.
Абай мұрасын цифрлық форматта тарату жұмысы да кең қанат жаймақ. TikTok, Instagram, YouTube платформаларында ақын шығармашылығы жастарға заманауи тілмен жеткізіледі. Белгілі блогерлер мен инфлюенсерлер «Қара сөздерден» үзінді оқып, ой бөлісетін челлендждерге қатысады. Сонымен бірге, Абай өмірі туралы тарихи телесериал түсіріліп жатыр.
Қоғамда рухани тірек іздеудің өзектілігі арта түскен қазіргі кезеңде Абайдың адамгершілік, білім, еңбек, ақиқат пен сыйластықты насихаттаған идеялары ерекше мәнге ие. Білім беру, мәдениет және идеология саласының өкілдері мерейтойды ұлттық идея мен құндылықтарды жаңаша ұғынуға бастайтын маңызды сәт ретінде қабылдап отыр.
Министрліктің мәлімдеуінше, Абайдың 180 жылдығы – елдің рухани жаңғыруының терең көрінісі болмақ. Бұл күн ауылдан Елордаға дейінгі аралықта, оқушыдан ғалымға дейінгі әр азаматты ұлы ойшылдың мұрасымен қайта таныстырып, өзін-өзі тануға жетелейтін рухани белеске айналады.
1099 рет оқылды
