2019 жылдың 1 қазанынан бастап 100janaesim.ruh.kz сайтында «Қазақстанның 2019 жылғы 100 жаңа есімі: жас қазақстандықтардың табыс тарихы» жобасына өтінімдер қабылдау басталды. Бұл туралы бүгін елордада өткен баспасөз мәслихатында мәлім болды, деп хабарлайды ҚазАқпарат.
Атап айтқанда, ҚР Ақпарат және қоғамдық даму министрлігінің бастамасын өткен жылдардағы ең белсенді жеңімпаздардан тұратын «Бюро 100» командасы қолдау жасауда. Олар байқауға ең лайықты үміткерлерді іздестіру үшін Қазақстанның барлық аймақтарына баруды көздейді. Команда әлеуметтік желілерден жоба қатысушыларын іздеудің барлық кезеңдерін көрсетеді.
«Үлкен жобаны бастағалы жатырмыз. Өздеріңіз жақсы білесіздер, осыдан екі жыл бұрын Елбасы «Рухани Жаңғыру» атты бағдарламасына бастамашылық етті. Осы орайда соның аясында «100 жаңа есім» жобасының үшінші кезеңін бастамақпыз. Бұл жоба қоғамның дамуына өзінің үлкен ықпалын тиігізіп келеді, сондықтан оны жалғастыруға бел будық», - деді ҚР Ақпарат және қоғамдық даму министрі Дәурен Абаев.
Ведомство басшысы «100 жаңа есім» жобасы Тәуелсіздік жылдарында елімізге оң ықпалын тигізген азаматтарды насихаттау, олардың еңбек тәжірибесін таныстыру мақсатында ұйымдастырылғанын еске салды.
«Екі жылдың ішінде 5 мыңға жуық адам қатысты. Бұл тұрғыда жоба аясында екі миллионға жуық қазақстандық дауыс берді», - деді Д. Абаев.
Биыл жоба Жастар жылына арналады. Іріктеуге 39 жасқа дейінгі адамдар қатыса алады. Осы орайда ғылым, қоғам, медицина, бизнес, мәдениет және спорт саласындағы нақты жетістікке жеткендердің өтінімдері қаралатын болады.
«Рухани Жаңғыру» Қазақстандық қоғамдық даму институты» коммерциялық емес АҚ Басқарма төрағасы Кемелбек Ойшыбаевтың сөзіне қарағанда, қатысатын адамдар 100janaesim.ruh.kz сайтында сауалнаманы толтыруы қажет. Қатысушы сенімді әрі нақты ақпарат беруге міндеттеледі. Барлық өтінімдер модерациядан өтіп, кейін сайтта жарияланып, желіде дауыс беруге рұқсат алады. Сонымен қатар, белгілі қоғам және мәдениет қайраткерлері, спорт және бизнес өкілдерінен тұратын қазылар алқасының қарауына ұсынылады.
«Жоба аясында өтінімдерді қабылдау 1 қазаннан бастап 20 қазанға дейін жалғасады», - деді К. Ойшыбаев.
Жобаның ресми сайтында қалаған үміткерге дауыс беру үшін онлайн тіркеліп, электронды пошта көрсетілуі керек.
Белгілі болғандай, жобаның нәтижелері биыл желтоқсан айында Елбасының қатысуымен өтетін таныстырылымда жарияланады.
Естеріңізге сала кетейік, биыл ақпан айында Елбасы Нұрсұлтан Назарбаев «100 жаңа есім» жобасының ары қарай жалғасатынын айтқан болатын.
2083 рет оқылды_140_110.webp)
