2019 jyldyń 1 qazanynan bastap 100janaesim.ruh.kz saitynda «Qazaqstannyń 2019 jylǵy 100 jańa esimi: jas qazaqstandyqtardyń tabys tarihy» jobasyna ótinimder qabyldaý bastaldy. Bul týraly búgin elordada ótken baspasóz máslihatynda málim boldy, dep habarlaidy QazAqparat.
Atap aitqanda, QR Aqparat jáne qoǵamdyq damý ministrliginiń bastamasyn ótken jyldardaǵy eń belsendi jeńimpazdardan turatyn «Biýro 100» komandasy qoldaý jasaýda. Olar baiqaýǵa eń laiyqty úmitkerlerdi izdestirý úshin Qazaqstannyń barlyq aimaqtaryna barýdy kózdeidi. Komanda áleýmettik jelilerden joba qatysýshylaryn izdeýdiń barlyq kezeńderin kórsetedi.
«Úlken jobany bastaǵaly jatyrmyz. Ózderińiz jaqsy bilesizder, osydan eki jyl buryn Elbasy «Rýhani Jańǵyrý» atty baǵdarlamasyna bastamashylyq etti. Osy oraida sonyń aiasynda «100 jańa esim» jobasynyń úshinshi kezeńin bastamaqpyz. Bul joba qoǵamnyń damýyna óziniń úlken yqpalyn tiigizip keledi, sondyqtan ony jalǵastyrýǵa bel býdyq», - dedi QR Aqparat jáne qoǵamdyq damý ministri Dáýren Abaev.
Vedomstvo basshysy «100 jańa esim» jobasy Táýelsizdik jyldarynda elimizge oń yqpalyn tigizgen azamattardy nasihattaý, olardyń eńbek tájiribesin tanystyrý maqsatynda uiymdastyrylǵanyn eske saldy.
«Eki jyldyń ishinde 5 myńǵa jýyq adam qatysty. Bul turǵyda joba aiasynda eki millionǵa jýyq qazaqstandyq daýys berdi», - dedi D. Abaev.
Biyl joba Jastar jylyna arnalady. Irikteýge 39 jasqa deiingi adamdar qatysa alady. Osy oraida ǵylym, qoǵam, meditsina, biznes, mádeniet jáne sport salasyndaǵy naqty jetistikke jetkenderdiń ótinimderi qaralatyn bolady.
«Rýhani Jańǵyrý» Qazaqstandyq qoǵamdyq damý institýty» kommertsiialyq emes AQ Basqarma tóraǵasy Kemelbek Oishybaevtyń sózine qaraǵanda, qatysatyn adamdar 100janaesim.ruh.kz saitynda saýalnamany toltyrýy qajet. Qatysýshy senimdi ári naqty aqparat berýge mindetteledi. Barlyq ótinimder moderatsiiadan ótip, keiin saitta jariialanyp, jelide daýys berýge ruqsat alady. Sonymen qatar, belgili qoǵam jáne mádeniet qairatkerleri, sport jáne biznes ókilderinen turatyn qazylar alqasynyń qaraýyna usynylady.
«Joba aiasynda ótinimderdi qabyldaý 1 qazannan bastap 20 qazanǵa deiin jalǵasady», - dedi K. Oishybaev.
Jobanyń resmi saitynda qalaǵan úmitkerge daýys berý úshin onlain tirkelip, elektrondy poshta kórsetilýi kerek.
Belgili bolǵandai, jobanyń nátijeleri biyl jeltoqsan aiynda Elbasynyń qatysýymen ótetin tanystyrylymda jariialanady.
Esterińizge sala keteiik, biyl aqpan aiynda Elbasy Nursultan Nazarbaev «100 jańa esim» jobasynyń ary qarai jalǵasatynyn aitqan bolatyn.
.jpeg)