Foto: QyzPU baspasóz qyzmeti
21-22 qarasha aralyǵynda Qazaq ulttyq qyzdar pedagogikalyq ýniversitetinde «Tech QyzPU Niğde Hack: AI jáne jumysshy mamandyqtar» taqyrybynda halyqaralyq hakaton ótti, dep habarlaidy Ult.kz.
Is-shara Memleket basshysy Qasym-Jomart Toqaevtyń jumysshy mamandyqtarynyń bedelin arttyrý jónindegi bastamasyn qoldaý maqsatynda uiymdastyrylyp otyr. Sonymen qatar hakaton Prezidenttiń jyl saiynǵy Joldaýynda kórsetilgen tsifrlandyrý men jasandy intellektti damytýǵa qatysty tapsyrmalardy júzege asyrýǵa úles qospaq.
Joba Túrkiia Respýblikasynyń Niide Ómer Halisdemir ýniversiteti jáne Niide tehnoparkimen jasalǵan ekijaqty kelisim aiasynda ótti.
Hakatonnyń ashylýynda Basqarma Tóraǵasy – Rektor mindetin atqarýshy Sábit Sýatai sóz sóilep, sharanyń mańyzdylyǵyna toqtaldy.
«Hakaton – saiys qana emes, innovatsiia men shyǵarmashylyqtyń merekesi. Bizdiń ýniversitet jasandy intellekt, tsifrlyq pedagogika, IT jáne EdTech baǵyttarynda mańyzdy jobalardy júzege asyryp keledi. Sondyqtan bul hakaton bizdiń strategiialyq maqsattarymyzǵa tolyq sai keledi», – dedi Sábit Qurmanjanuly.
24 saǵattyq jarystyń basty maqsaty – qysqa merzim ishinde toptyq jumys arqyly innovatsiialyq baǵdarlamalyq sheshimder ázirleý. Biylǵy dodaǵa elimizdegi onǵa jýyq joǵary oqý ornynan jiyrma alty komanda qatysty. Uiymdastyrýshylar barlyq qatysýshyny joǵary jyldamdyqty internetpen, jumys oryndarymen, elektr qýatymen qamtamasyz etip, tamaq pen sýsyndardy tegin usyndy.
«Biz bul sharany tek jarys retinde emes, jańa kezeńge bastaityn, jańa múmkindikterge jol ashar baspaldaq dep qaraimyz. Sondyqtan da hakatonǵa qatysqan árbir qatysýshyny jeńimpaz dep esepteimiz. Osy sharanyń arqasynda alda talai jeńisterdiń esigi ashylady degen oidamyn. Niide Ómer Halisdemir ýniversiteti tarapynan da ortaq jobalardy júzege asyrý úshin qadamdar jasalyp jatyr», – dedi Niide Ómer Halisdemir ýniversiteti, Kompiýter jáne aqparattyq ǵylymdar fakýltetiniń dekany, doktor Alper Aitekin.
Hakatonnyń sońynda komandalar óz jobalaryn QyzPU, Niide Ómer Halisdemir ýniversiteti jáne Niide tehnoparkiniń ókilderinen turatyn qazylar alqasyna usyndy. Baǵalaý nátijesinde birinshi orynǵa Qazaq ulttyq qyzdar pedagogikalyq ýniversitetiniń «NSA» komandasy ie boldy. Ekinshi orynǵa eki komanda – Ǵumarbek Dáýkeev atyndaǵy Almaty energetika jáne bailanys ýniversitetiniń jáne Muhametjan Tynyshbaev atyndaǵy ALT ýniversitetiniń komandasy laiyq dep tanyldy. Al úshinshi oryn M.H. Dýlati atyndaǵy Taraz ýniversitetiniń, Almaty Tehnologiialyq Ýniversitetiniń jáne QyzPU komandalaryna berildi.
Jeńimpaz atanǵan Qazaq ulttyq qyzdar pedagogikalyq ýniversitetiniń «NSA» komandasy óz qýanyshtarymen bólisti:
«Aldyńǵy jyly da qatysyp, 3-oryndy ielengen edik. Biyl qaýipsizdik máselesi ózekti bolǵandyqtan, osy keisti tańdadyq. Úsheýmiz mindetterdi ózara bólisip alyp, 24 saǵat boiy bar kúshimizdi salyp jumys istedik. Aldaǵy ýaqytta jasandy intellekt baǵytynda tájiribemizdi odan ári damytqymyz keledi. Túrkiiaǵa budan da jaqsy daiyndyqpen barýdy josparlap otyrmyz. Ýniversitetimizdiń atyn shyǵaryp, úlken jetistikterge jetemiz dep senemiz», – dedi top múshesi, 4 kýrs stýdenti Nazerke Turǵanbek.
Jeńimpazdarǵa qarjylai sertifikattar tabystalyp, birinshi oryn iegerine qosymsha Túrkiiadaǵy Niide tehnoparkiniń akseleratsiialyq baǵdarlamasyna qatysý sertifikaty usynyldy.
.jpeg)
