Qyrǵyzstanda parlament sailaýynyń nátijesine narazylar Aq úi, parlament ǵimaratyn basyp alyp, elde halyqtyq úkimet qurý qajettigi jaily málimdemeler aityla bastaǵan shaqta prezident Sooronbai Jeenbekov videomálimdeme jasady.
Jeenbekov málimdemesinde saiasi kúshter bilikti zańsyz tartyp alýǵa áreket etip, sailaýdy syltaýratyp, qoǵamdyq tártipti buzdy dep narazylardy aiyptaǵan.
"Qala turǵyndarynyń tynyshtyǵyn buzdy. Tártip saqshylaryna baǵynbai, dárigerlerdi sabap, ǵimarattardy talqandady. Qan tógilmesin, bir de bir azamattyń ómirine qaýip tónbesin dep kúshtik qurylymdarǵa oq atpaýǵa buiryq berdim. Qazirge deiin jaǵdaidy ýshyqtyrmaý úshin múmkin bolǵan árekettiń barlyǵyn jasadyq. Memlekettik tynyshtyǵy, qoǵamnyń turaqtylyǵy depýtat mandatynan biik" dedi Jeenbekov.
Ol málimdemede saiasi partiialardy úmitkerlerin narazylyq oshaqtarynan alyp ketýge jáne barlyq kúshterdi zań aiasynda áreket etýge úndegen. Jeenbekov ortalyq sailaý komissiiasyna zańbuzýshylyqtardy zerttep, qajet bolsa sailaý qorytyndysyn joqqa shyǵarýdy da usynǵan.
Qyrǵyzstanda parlament sailaýynyń aldyn ala qorytyndysymen kelispegen narazy top 5 qazanda kúndiz Bishkek ortalyǵynda miting ótkizip, Jeenbekovtiń bilikten ketýin, qaita sailaý ótkizýdi talap etken edi. Keshke qarai parlament pen prezident ákimshiligi mańynda narazylar men politsiia qaqtyǵysyp qalǵan. Narazylardy taratýǵa tyrysqan kúshtik qurylym ókilderi kózden jas aǵyzatyn gaz, rezeńke oq, tútin qutylar qoldanǵan, sý shashqan. Ondaǵan adam jaralanǵan. Keiinirek narazy top parlament ǵimaratyn, Aq úi, memlekettik ulttyq qaýipsizdik komiteti men qoǵamdyq KTRK arnasyn basyp alǵan.
Narazylar talabynan soń burynǵy prezident Almazbek Atambaev, eks-premer Sapar Isakov, burynǵy depýtat Sadyr Japarov, burynǵy depýtat Ravshan Jeenbekov qamaýdan bosatyldy. Seisenbi kúni tańerteń Aq úiden órt shyqqan.
