Astanada Qytaidyń dástúrli Kúz ortasy merekesine jáne Qytai Halyq Respýblikasynyń qurylǵanyna 77 jyl tolýyna orai «Tiania gýn tsy shi» atty merekelik kontsert ótti, dep habarlaidy ult.kz.
Qazaqstan men Qytai arasyndaǵy mádeni almasý men dostyq bailanystardy odan ári nyǵaitýǵa arnalǵan kontsertti Astanadaǵy Qytai mádeni ortalyǵy Chýntsin qalasynyń opera teatrymen birlesip uiymdastyrdy.
Merekelik shara Qytai Halyq Respýblikasynyń Mádeniet jáne týrizm ministrligi men Chýntsin qalasynyń Halyq úkimeti bastamasymen júzege asqan joba aiasynda ótti. Is-sharany Astanadaǵy Qytai mádeni ortalyǵy Qazaqstandaǵy Qytai Elshiliginiń qoldaýymen uiymdastyrdy. Al kontserttiń ótýine Qazaqstan Respýblikasynyń Mádeniet jáne aqparat ministrligi men Qalibek Qýanyshbaev atyndaǵy Qazaq ulttyq mýzykalyq-drama teatry jan-jaqty qoldaý kórsetti.
Keshti ashqan Qytaidyń Qazaqstandaǵy Elshisi Han Chýnlin myrza merekeniń erekshe mánine toqtaldy.
«Altyn kúz salqyn samalyn ákelip, túngi aspanda tolyq ai jarqyraidy. Al Jibek jolynyń keshki samaly ózimen birge shynaiy dostyqtyń jylýyn jetkizgendei», — dedi Han Chýnlin.
Ol sondai-aq kontsertti uiymdastyrýǵa qoldaý kórsetken Qazaqstan Respýblikasynyń Mádeniet jáne aqparat ministrligine alǵys bildirdi.
Óz kezeginde Qazaqstan Respýblikasy Mádeniet jáne aqparat vitse-ministri Aibek Sydyqov kontserttiń mańyzyna toqtalyp, Qytaidyń Ulttyq merekesi men Kúz ortasy merekesine orai izgi tilegin jetkizdi.
«Búgingi «Bir aspan astyndaǵy ortaq sát» atty kúzgi kontserttiń ashylýymen shyn júrekten quttyqtaimyn! Sondai-aq Qytaidyń barlyq qurmetti qonaqtary men dostaryna Qytaidyń Ulttyq merekesi jáne Kúz ortasy merekesi (Chjýntsiý) orai shynaiy izgi tilekterimdi bildiremin!» — dedi vitse-ministr óz sózinde.
«Tiania gýn tsy shi» kontserti Qazaqstan men Qytaidyń Mádeniet jyldary baǵdarlamasynyń bir bóligi boldy. Sharanyń negizgi maqsaty – eki el arasyndaǵy mádeni bailanystardy, ózara túsinistik pen halyqtar arasyndaǵy dostyqty nyǵaitý.
Chýntsin qalasynyń Mádeniet jáne týrizmdi damytý komiteti tóraǵasynyń orynbasary Lo Siaochýn kontserttiń Qazaqstan men Qytai arasyndaǵy mádeni ózara is-qimyldyń jalǵasy ekenin atap ótti.
«Búgingi Orta kúz merekesine arnalǵan kontsert – eki el basshylary arasyndaǵy mańyzdy ýaǵdalastyqtardyń naqty júzege asýynyń jarqyn kórinisi ári Mádeniet jylynyń praktikalyq jalǵasy», — dedi ol.
Kontsertke Qazaqstan men Qytaidyń túrli salalaryndaǵy joǵary laýazymdy ókilder, sondai-aq birqatar memleketterdiń elshileri qatysty.
Kesh qonaqtaryna Qytaidyń mýzykalyq óneriniń bailyǵy men san alýandyǵyn tanytatyn arnaiy baǵdarlama usynyldy. Astana kórermenderi aldynda áigili Chýntsin opera teatrynyń ónerpazdary óner kórsetti.
Kontserttiń shymyldyǵy qazaqtyń «Júrek» halyq áni men qytaidyń «Kún qýanyshpen kóteriledi» atty halyq áni negizinde oryndalǵan áserli dýetpen ashyldy. Eki eldiń ánderin toǵystyrǵan alǵashqy mýzykalyq nómir keshtiń negizgi mazmunyn aiqyndaǵandai boldy.
Foto: ult.kz
Odan keiin ónerpazdar qazaqtyń «Ana», «Týǵan jerdiń bulttary» ánderin oryndap, uiǵyr ánderinen de shashý shaty. Ónerpazdar kórermenderge Qytaidyń halyq shyǵarmashylyǵynan birqatar mýzykalyq týyndylardy usyndy. Olar estradalyq ánder aityp, dástúrli aspaptarda mýzykalyq shyǵarmalar oryndady.
Foto: ult.kz
Merekelik kontsert Qytaidyń dástúrli mádenietin tanystyrýmen qatar, Qazaqstan men Qytai arasyndaǵy mádeni-gýmanitarlyq yntymaqtastyqty damytýǵa baǵyttalǵan kezekti mańyzdy shara boldy.
Foto: ult.kz
Foto: ult.kz
Kúz ortasy merekesi, qytai tilinde Chjýntsiýtsze dep atalatyn bul meiram Qytai halqy erekshe qadir tutatyn dástúrli merekelerdiń biri sanalady. Ol ai kúntizbesi boiynsha segizinshi aidyń 15-kúninde atalyp ótedi. Biyl Kúz ortasy merekesi 25 qyrkúiekke sáikes keledi.
Mereke eń aldymen tolǵan aidy tamashalaý, otbasy músheleriniń basyn qosý jáne jaqyndaryna amandyq, bereke men molshylyq tileý dástúrlerimen bailanysty. Qytai mádenietinde tolyq ai otbasynyń tutastyǵy men adamdardyń birligin bildiretin erekshe nyshan sanalady.
Chjýntsiýtszeniń basty simvoldarynyń biri – iýebin dep atalatyn dóńgelek pishindi ai bálishteri. Onyń dóńgelek formasy tolyq aidy beinelep, otbasy birligi men baqyttyń belgisi retinde qabyldanady. Mereke kezinde mundai táttilerdi otbasy músheleri birge bólisip, bir-birine izgi tilekterin bildiredi.
Foto: ult.kz
Foto: ult.kz
Biyl Kúz ortasy merekesiniń mańyzy Qytai úshin taǵy bir aitýly kúnmen sabaqtasyp otyr. Atap aitqanda, 1 qazanda Qytai Halyq Respýblikasynyń qurylǵanyna 77 jyl tolady. Osyǵan bailanysty biylǵy merekelik sharalarda dástúrli mádeni qundylyqtarmen qatar, eldiń mańyzdy tarihi datasy da keńinen atalyp ótýde.
