Sherhan Murtaza - qazaq ádebieti men jýrnalistikasynda óshpes iz qaldyrǵan kórnekti qalamger, qoǵam qairatkeri jáne Halyq jazýshysy. Ol shyǵarmashylyǵy men azamattyq ustanymy arqyly eldiń rýhani ómirine zor úles qosyp, ult múddesin qorǵaǵan tulǵa retinde tarihta qaldy, dep habarlaidy Ult.kz.
Sherhan Murtaza 1932 jyldyń 28 qyrkúieginde Jambyl oblysynyń Jýaly aýdanyndaǵy Myńbulaq aýylynda dúniege kelgen. Balalyq shaǵy asharshylyq pen saiasi qýǵyn-súrgin jyldarymen tuspa-tus keldi. Ákesi «halyq jaýy» degen jalǵan aiyppen jer aýdarylyp, otbasy aýyr kezeńdi bastan ótkerdi. Jazýshynyń keiingi shyǵarmalarynda anasy Aishanyń qaisarlyǵy men ómir joly erekshe oryn aldy. Onyń áigili «Ai men Aisha»romany - sonyń aiqyn dáleli.
Máskeý memlekettik ýniversitetiniń jýrnalistika fakýltetin támamdaǵan soń Sherhan Murtaza qazaq baspasózinde eńbek jolyn bastady. Ol ár jyldary «Leninshil jas» (qazirgi «Jas Alash»), «Sotsialistik Qazaqstan» (qazirgi «Egemen Qazaqstan») gazetterinde, sondai-aq «Jalyn» jáne «Juldyz» jýrnaldarynda basshylyq qyzmet atqardy.
Redaktor retinde ol qoǵamdaǵy ótkir máselelerdi kóterýden taiynbai, qazaq tiliniń mártebesi, ulttyq qundylyqtar men tarihi ádilettilik taqyryptaryn batyl jazdy. Sonymen birge Fariza Ońǵarsynova, Muhtar Shahanov, Oralhan Bókei syndy kóptegen qalamgerdiń shyǵarmashylyq jolyna qoldaý kórsetken tulǵa retinde de qurmetke ie boldy.
Sherhan Murtaza qoǵamdyq-saiasi ómirge de belsendi aralasty. Ol Joǵarǵy Keńes pen Qazaqstan Respýblikasy Parlamenti Májilisiniń depýtaty retinde jer máselesi, memlekettik til jáne ulttyq múdde tóńiregindegi ózekti taqyryptardy kóterip, ashyq pikir bildirdi.
Jazýshynyń pýblitsistikalyq eńbekteri aýyl tirshiliginen bastap eldiń áleýmettik, ekonomikalyq jáne rýhani máselelerine deiin keń aýqymdy qamtydy. Onyń shyǵarmalary tereń oiymen, shynaiylyǵymen jáne azamattyq ustanymymen erekshelendi.
Sherhan Murtazanyń ádebi jáne qoǵamdyq qyzmeti joǵary baǵalanyp, ol «Otan», «Qurmet belgisi» ordenderimen marapattaldy. Sondai-aq Qazaqstan men Qyrǵyzstannyń birqatar memlekettik marapattaryna ie boldy.
Sheraǵanyń shyǵarmashylyq murasy búgingi kúni de ózektiligin joǵaltqan joq. Onyń kitaptary men pýblitsistikalyq eńbekteri birneshe býyn oqyrmanǵa oi salyp, ult rýhaniiatynyń asyl qazynasyna ainaldy.
