Qazaqstan Táýelsizdiginiń 35 jyldyǵy el tarihyn zerdeleý isine de jańa serpin berdi. Memleket tarihy institýtynyń direktory Nurbek Pusyrmanovtyń aitýynsha, táýelsizdik jyldarynda Qazaqstan tarihy burynǵy ideologiialyq shekteýlerden arylyp, akademiialyq erkindik qaǵidattaryna negizdelgen jańa kezeńge ótti. Bul ózgeristiń mańyzdy nátijeleriniń biri – Qazaqstan tarihynyń jeti tomdyq akademiialyq eńbeginiń jaryq kórýi, dep habarlaidy ult.kz.
Qazaqstan Táýelsizdiginiń 35 jyldyǵy – eldiń saiasi, áleýmettik jáne ekonomikalyq damýymen qatar, ulttyq tarih ǵylymyndaǵy ózgeristerdi de saralaityn mańyzdy kezeń. Táýelsizdik alǵannan beri Qazaqstan tarihyn zertteý men zerdeleýdiń mazmuny jańaryp, otandyq tarih ǵylymynda jańa ǵylymi kózqarastar qalyptasty.
Memleket tarihy institýtynyń direktory Nurbek Pusyrmanov Qazaqstan tarihynyń táýelsizdik jyldaryndaǵy damý ereksheligine toqtalyp, eń aldymen ǵylymnyń ideologiialyq táýeldilikten arylǵanyn atap ótti.
«Biyl Táýelsizdigimizge 35 jyl. Bunyń aiasynda Qazaqstan tarihy da jańa deńgeige jetti. Óitkeni, birinshiden, biz ideologiialyq táýeldilikten arylyp, akademiialyq erkindikke óttik. Iaǵni qazirgi Qazaqstan tarihynyń jeti tomdyq eńbeginiń jazylýy da táýelsiz sana turǵysynan, akademiialyq eńbek turǵysynan óte mańyzdy ekenin atap ótken jón», – dedi Nurbek Pusyrmanov.
Ǵalymnyń pikirinshe, akademiialyq erkindik Qazaqstan tarihyn zertteýde jańa múmkindikterge jol ashty. Tarihi oqiǵalar men úderisterdi ǵylymi turǵydan qaita zerdeleý, burynǵy tujyrymdarǵa jańasha qaraý jáne ulttyq tarihtyń ózekti máselelerin derekter negizinde zertteý múmkindigi keńeidi.
Osy baǵyttaǵy mańyzdy ǵylymi jumystardyń biri – Qazaqstan tarihynyń jeti tomdyq akademiialyq basylymy. Eńbek elimizdiń ejelgi dáýirden qazirgi kezeńge deiingi tarihi damýyn júieli túrde qarastyrýǵa baǵyttalǵan. Onyń daiyndalýy Qazaqstan tarihyn táýelsiz ulttyq sana jáne zamanaýi akademiialyq ustanymdar negizinde zerdeleýdiń mańyzdy qadamy retinde baǵalanyp otyr.
Táýelsizdik jyldarynda tarihi sanany jańǵyrtý, ulttyq tarihtyń aqtańdaqtaryn zertteý jáne tarihi derekterdi ǵylymi ainalymǵa engizý máseleleri de ózekti baǵyttardyń birine ainaldy. Bul úderister Qazaqstan tarihynyń mazmunyn tolyqtyrýǵa jáne ony jańa ǵylymi deńgeide tanystyrýǵa múmkindik berdi.
Búginde otandyq tarih ǵylymynyń aldynda ótkendi zertteýmen qatar, tarihi protsesterdi zamanaýi ǵylymi ádister arqyly paiymdaý, jas urpaqqa obektivti tarihi bilim berý jáne ulttyq tarihi sanany qalyptastyrý mindetteri tur.
