Memleket basshysy Qasym-Jomart Toqaevtyń kitap oqý mádenietin damytý jáne zerdeli ult qalyptastyrý jónindegi Jarlyǵy kitap pen oqyrman máselesin memlekettik deńgeidegi basym baǵyttardyń birine shyǵardy. Osy bastamany jalǵastyrǵan Qazaqstan Respýblikasynyń Mádeniet jáne aqparat ministri Arman Qyryqbaev qoǵam ókilderin «Jyldyń 10 oqyrmany» jobasyna qatysýǵa shaqyrdy.
ARMAN-PV baspasynyń bas direktory Didara Alina bul bastamany kitap indýstriiasy úshin mańyzdy qadam dep baǵalaidy.
«Baspager retinde bul bastamany qoldaimyn. Turaqty oqyrman – kitap indýstriiasynyń negizgi tiregi. Oqyrman kóbeigen saiyn sapaly mazmunǵa suranys artady, jańa avtorlarǵa jol ashylady, baspa men kitap saýdasy damidy. Sondyqtan oqý mádenietin qalyptastyrý – tek aǵartýshylyq másele emes, tutas salanyń bolashaǵyna áser etetin faktor», – deidi Didara Alina.
2002 jyldan beri jumys istep kele jatqan ARMAN-PV oqý, oqý-ádistemelik, tanymdyq jáne mádeni basylymdar shyǵarady. Shirek ǵasyrǵa jýyq tájiribesi bar baspa búginde qazaqstandyq kitapty halyqaralyq kásibi ortada tanystyrý baǵytyn da kúsheitip keledi.
Qazir baspa 7–11 qazanda ótetin Frankfurter Buchmesse 2026 halyqaralyq kitap jármeńkesine daiyndalyp, jańa basylymdaryn ázirlep jatyr. Qazaqstandyq baspalardyń Frankfýrt kórmesine qatysýyn Mádeniet jáne aqparat ministrligi sońǵy jyldary júieli qoldap keledi. 2024 jáne 2025 jyldary ministrliktiń qoldaýymen Qazaqstannyń ulttyq stendi uiymdastyrylyp, ARMAN-PV otandyq baspalar qatarynda kórmege qatysty.
«Frankfýrt – kitapty kórsetý alańy ǵana emes. Bul avtorlyq quqyq, aýdarma, seriktestik jáne jańa naryqtar týraly kelissóz júretin kásibi orta. Ministrliktiń qazaqstandyq baspalardy halyqaralyq alańdarǵa shyǵarýǵa kórsetip otyrǵan qoldaýy biz úshin mańyzdy. Biyl da jańa kitaptarymyzdy halyqaralyq aýditoriiaǵa laiyq deńgeide usynýǵa daiyndalyp jatyrmyz», – deidi baspa basshysy.
Didara Alinanyń aitýynsha, ishki naryqta turaqty oqyrman qalyptastyrý men qazaqstandyq kitapty halyqaralyq deńgeige shyǵarý – bir-birin tolyqtyratyn eki baǵyt. Biri kitapqa suranysty arttyrsa, ekinshisi otandyq baspa indýstriiasynyń jańa naryqtarǵa shyǵýyna múmkindik beredi.
