Ile Qazaq avtonomiialyq aýdanyndaǵy Qulja qalasynda, Alty juldyzdy kvartalda erekshe mýzei bar. Ol – jergilikti turǵyn Aleksandr Zazýlin (Aleksandr Zazarin) myrzanyń akkardion mýzeii, dep habarlaidy ult.kz.
Mýzeidi kórý úshin Qazaqstannan barǵan jýrnalister ár túrli ult ókilderi turatyn, kórki kózdiń jaýyn alatyn Alty juldyzdy kvartaldaǵy Liýsin degen kósheni boilai júrip bardy.
Foto: ult.kz
Alty juldyzdy kvartaldyń tarihy 1934 jyldan bastalady. Ol Qytai Respýblikasynyń 23-jyly nemis injeneri Vaslidiń jobasymen salynǵan.
Kvartaldyń sáýlettik josparlaýynda aǵylshyn qoǵam qairatkeri Govard usynǵan «Bolashaqtyń minsiz qalasy – baq-qala» tujyrymdamasy negizge alynǵan.
Alty juldyzdy kvartaldyń ereksheligi – onyń josparlanýynyń naqtylyǵynda. Kvartalǵa joǵarydan qaraǵanda, ortalyqtaǵy saiabaqtan alty kóshe alty baǵytqa taraityny anyq kórinedi. Osy qurylym onyń ataýyna da negiz bolǵan.
Liýsin kóshesindegi Akkardion mýzeii kvartaldyń ózine tán ereksheligin buzbai, ádemi úilesip tur. Tipti kópultty aýdannyń túrli mádenietter toǵysyn aishyqtap turatyndai.
Foto: ult.kz
Aleksandr Zazýlinniń ózi osy Liýsin kóshesinde týyp ósken. Ol 15 jasynan bastap bar yntasymen kollektsiia jinaýmen ainalysyp keledi. Qazir onyń qorynda álemniń 27 elinen jinalǵan 800-den astam akkordeon jáne túrli halyqtarǵa tiesili 300-den astam mýzykalyq aspap bar.
Ol jastaiynan akkordeonǵa áýes bolyp, ómirin ony oinaýǵa, jóndeýge, kollektsiia jinaýǵa jáne dástúrin keiingi urpaqqa jetkizýge arnaǵan.
Ult.kz tilshisi Aleksandrdyń shákirti, qandasymyz 27 jastaǵy Tańnár Yrysbaiulymen suqbattasty.
«Meniń ustazym, ári kórshim – Aleksandr Zazýlin. Ustazymnan akkardionda oinap úigengenime 3-4 jyl boldy. Shyńjań kórkemóner ýniversitetinde án óneri boiynsha oqyp, bitirgennen keiin osy mýzeige jumysqa turdym. Sol kezde aǵai bizge akkardion tartýdy úiretti», – deidi suqbattasymyz.
Tańnárdiń ózi qazaqtyń «Saryjailaý», «Dýdar-ai», orystyń «Katiýsha», «Máskeý keshi» siiaqty ánderin unatady eken. Ol Qazaqstannan kelgen qonaqtarǵa birneshe án oryndap berdi.
Foto: ult.kz
Mýzeide akkardionnyń san túrin kórýge bolady. Eń úlken akkardion, eń kishkentai, eń jeńil jáne eń aýyr akkardiondy osy mýzeiden tabýǵa bolady. Bul jerde Qytaidyń túkpir-túkpirinen ákelingen aspaptar bar kórinedi.
Foto: ult.kz
Búginde Aleksandr Zazýlin «Orys akkardion óneri» ulttyq materialdyq emes mádeni mura jobasynyń ulttyq deńgeidegi ókili.
Mýzei qyzmetshisiniń sózinshe, Ileniń san alýan mádenieti mýzykalyq ónerdiń de alýan túriniń damýyna negiz boldy. Akkardion mýzykasy da mazmuny men oryndaý máneri jaǵynan bai ári alýan túrli.
Akkardion mádenietin, sondai-aq akkardionnyń paida bolý jáne damý tarihyn bilý Qytai men Batys arasyndaǵy mádeni almasýdy tereńirek túsinýge múmkindik beredi ári mádenietimizge degen senimimizdi nyǵaitady.
Al baiannyń Ilege taralý tarihyn bilý halyqtar arasyndaǵy ózara túsinistikti tereńdetip, olardyń dostyǵyn nyǵaitýǵa jáne mádenietterdiń ózara yqpaldastyǵyn arttyrýǵa óz septigin tigizedi.
Foto: ult.kz
