Atyraý oblysynda eki jańa sport nysany boi kóteredi. Onyń biri – Qulsary qalasynda, ekinshisi – Atyraý qalasynda salynady. Eki jobany da «Samuryq-Qazyna» qory júzege asyryp jatyr. Basty maqsat – óńir turǵyndary úshin sporttyń qoljetimdiligin arttyrý, dep habarlaidy ult.kz.
Qulsaryda jalpy aýmaǵy 1,6 myń sharshy metrdi quraityn dene shynyqtyrý-saýyqtyrý kesheniniń qurylysy júrip jatyr. Munda voleibol, basketbol, badminton, ústel tennisi jáne ulttyq kúrespen ainalysýǵa múmkindik bolady. Sonymen qatar meditsinalyq kabinet pen jattyǵýlardy yńǵaily ótkizýge qajetti infraqurylym qarastyrylǵan.
Al Atyraý qalasynda balalar men eresekterge, onyń ishinde erekshe qajettiligi bar azamattarǵa arnalǵan inkliýzivti sporttyq-ońaltý ortalyǵy salynýda. Jalpy aýmaǵy 3 600 sharshy metr bolatyn ortalyqta bassein, trenajer zaly, sport jáne jekpe-jek zaldary, beiimdeý jáne ońaltý aimaqtary, sondai-aq meditsinalyq kabinet jumys isteitin bolady.
Foto: Samuryq-Qazyna
Búginde qordyń qoldaýymen elimiz boiynsha 19 sport nysany paidalanýǵa berilgen. Biyl taǵy 11 sport kesheniniń qurylysy bastaldy.
2026 jyly «Samuryq-Qazyna» AQ óziniń 20 jyldyq mereitoiyn atap ótedi. Osy ýaqyt ishinde qor aktivterdi basqarýmen qatar qoǵam úshin mańyzdy bastamalardy qoldap keledi. 2016 jyldan beri qor kompaniialary tobynyń qaiyrymdylyq baǵdarlamalarynyń biryńǵai operatory – «Samruk-Kazyna Trust» arqyly jalpy quny 120 mlrd teńgeden asatyn 430-dan astam áleýmettik joba júzege asyryldy.
