Almaty oblysyndaǵy «Barys» avtobazary ornalasqan 36,7 gektar jer ýchaskesi memleket menshigine ótti. Bul týraly Qarasai aýdany ákimdigi Kazinform agenttiginiń resmi saýalyna bergen jaýabynda málimdedi, dep habarlaidy ult.kz.
Aýdan ákimdiginiń habarlaýynsha, jer ýchaskesi sot sheshimderiniń negizinde memleketke qaitarylyp, tiisti jer qoryna engizilgen.
«Qarasai aýdandyq sotynyń 2023 jylǵy 17 sáýirdegi №00.23.1952-2/249 sheshimine, sondai-aq Qarasai aýdandyq sotynyń 2023 jylǵy 1 sáýirdegi №00.26.1993-2/781 sheshimine sáikes, Qarasai aýdanynda ornalasqan „Barys“ avtobazary memleket menshigine ótti. Jer ýchaskesi memleketke qaitarylyp, qoldanystaǵy zańnama talaptaryna sáikes tiisti jer qoryna engizildi», – delingen ákimdik jaýabynda.
Buǵan deiin Almaty oblysynyń jer qatynastary basqarmasy «Barys» bazary ornalasqan jer telimderi 2004-2018 jyldary Bolat Nazarbaevqa avtobazar ashý úshin zań talaptaryn buza otyryp berilgenin habarlaǵan. Atap aitqanda, jer telimderin bólý kezinde konkýrs ótkizilmegen, al aýyl sharýashylyǵy maqsatyndaǵy jerlerdiń sanaty zańsyz ózgertilgen.
Osy zańbuzýshylyqtarǵa bailanysty Qarasai aýdandyq prokýratýrasy 2023 jylǵy 10 qańtarda jerdi memleket menshigine qaitarý týraly sotqa talap aryz túsirgen. Sottyń 17 sáýirdegi sheshimimen 11,5 gektar jer aýdannyń jer qoryna qaitaryldy. Keiin prokýratýra «Auto market Karasay» JShS-ne tiesili qalǵan 25,5 gektardan astam aýmaqty da memleketke qaitarý týraly talap aryz bergen.
