Almatyda Jańa jyl merekesine daiyndyq bastaldy. Biyl qalany merekelik bezendirýge, Abai alańyna alyp shyrsha ornatýǵa, kontsert uiymdastyrýǵa jáne kóshelerdi jaryqtandyrýǵa biýdjetten 512,3 mln teńgeden astam qarajat bólý josparlanyp otyr. Bul týraly memlekettik satyp alý portalynda jariialanǵan lottardan belgili boldy, dep habarlaidy ult.kz.
Shyǵynnyń basym bóligi Abai alańyn bezendirýge baǵyttalmaq. Almaty qalalyq mádeniet basqarmasyna qarasty «Almaty áýenderi» KMQK bul maqsatqa jalpy somasy 288,7 mln teńgeni quraityn tórt lot jariialaǵan.
Tehnikalyq qujattamaǵa sáikes, alańǵa biiktigi keminde 13 metr bolatyn úsh qabatty jańajyldyq shyrsha ornatylady. Onyń bir qabaty ainalyp turýy tiis. Shyrshany daiyndaý jáne ornatý jumystaryna 74,9 mln teńge qarastyrylǵan.
Al 79,4 mln teńgege 20 saýda úishigi men shaǵyn sáýlet nysandary ornatylmaq. Olardyń arasynda «2027» degen jaryqdiodty kompozitsiia, shabadan, retrotelefon, áýe shary jáne radioqabyldaǵysh úlgisindegi fotoaimaqtar bar.
Budan bólek, syilyq, gramofon, telefon býdkasy men táttiler túrindegi taqyryptyq installiatsiialarǵa 64,9 mln teńge jumsaý kózdelgen. Taǵy 69,4 mln teńge Abai alańy men Respýblika saraiynyń mańyndaǵy keminde 100 aǵashty jaryqpen bezendirýge, fontandardy jabýǵa jáne dekorativti elementter ornatýǵa baǵyttalady.
Merekelik kóńil kúi syilaityn kontserttik baǵdarlama da arzanǵa túspek emes. Sahnany tehnikalyq jabdyqtaý men kontsert ótkizýge jalpy 138,9 mln teńge qarastyrylǵan.
Onyń 69,4 mln teńgesi sahna, dybys jáne jaryq jabdyqtaryn, alty jaryq munarasyn ornatýǵa ári úsh kún boiy tehnikalyq súiemeldeýge jumsalmaq.
Qalǵan 69,4 mln teńge kontserttik baǵdarlamany uiymdastyrýǵa arnalǵan. Jospar boiynsha, úsh kúnniń árqaisysynda keminde bes tanymal estrada ánshisi, bi jáne balalar shyǵarmashylyq ujymdary óner kórsetedi. Sonymen qatar Aiaz Ata men Aqshaqardyń qatysýymen teatrlandyrylǵan qoiylym qoiylyp, qazaq jáne orys tilderinde júrgizýshiler jumys isteidi.
Qala kósheleri de merekelik bezendirýden tys qalmaidy. Almaty mádeniet basqarmasy 320 qos qyrly jaryqdiodty konstrýktsiiany daiyndap, ornatýǵa 84,8 mln teńge qarastyrǵan.
Osylaisha, memlekettik satyp alý portalynda jariialanǵan lottar boiynsha Almatynyń jańajyldyq bezendirilýi men merekelik is-sharalaryna 512,3 mln teńgeden astam qarajat jumsaý josparlanyp otyr. Bul ázirge jariialanǵan satyp alýlardyń somasy ǵana. Aldaǵy ýaqytta qosymsha lottar paida bolsa, jalpy shyǵyn kólemi budan da artýy múmkin.
