Almatynyń Bostandyq aýdanynda kásipkerlerdiń qoldaýymen qoǵamdyq keńistikter jańaryp, qaraýsyz qalǵan aýmaqtar saiabaqtar men demalys oryndaryna ainalyp keledi. 2026 jyly ákimdik pen biznes ókilderiniń áleýmettik áriptestigi aiasynda 27 joba qolǵa alynǵan. Onyń 13-i aiaqtalyp, 14-i júzege asyrylyp jatyr. Jobalarǵa tartylǵan jeke investitsiia kólemi 2,8 mlrd teńgeden asady, dep habarlaidy ult.kz.
Bul bastamalardyń basty ereksheligi – qoǵamdyq infraqurylymdy jańartýǵa biýdjetten tys qarajat tartylýy. Kásipkerlerdiń qarjysyna balalar alańdary salynyp, alleialar, skverler men jaiaý júrginshiler joldary abattandyrylýda.
Aýdan ákimi Azamat Qaldybekovtiń aitýynsha, jobalar turǵyndardyń suranysy men kásipkerlerdiń múmkindikterin eskere otyryp ázirlengen.
«Biz qala ákiminiń memlekettik-jekemenshik áriptestikti damytý jónindegi bastamasyn qoldap, kásipkerlermen birge jobalar tizimin jasadyq. Qazir osyndai 27 joba júzege asyrylyp jatyr. Munda turǵyndardyń suranysy, biznestiń múmkindigi jáne ákimdiktiń uiymdastyrý jumystary eskerildi», – dedi ol.
Qaraýsyz aýmaqtan Shuaq alleiasyna deiin
Aýdandaǵy iri jobalardyń biri – buryn qoqys jinalyp, qaraýsyz qalǵan aýmaqta boi kótergen «Shuaq» alleiasy. Jobaǵa «DAC City LTD» kompaniiasy 350 million teńgeden astam qarjy bólgen.
Aýmaǵy abattandyrylyp, jaiaý júrginshiler joly, balalar jáne sport alańdary, sýburqaq, oryndyqtar men jaryqtandyrý júiesi ornatylǵan. Sonymen qatar 12 myńnan astam buta men iri kóshet otyrǵyzylǵan.
Aýdan ákimi Azamat Qaldybekovtiń sózinshe, bul aýmaqty abattandyrý qajettigin jaqyn mańdaǵy turǵyndar birneshe ret kótergen.
«Biz qoldanystaǵy jasyl jelekti saqtap, eki kósheni bailanystyratyn tolyqqandy jaiaý júrginshiler keńistigin jasaǵymyz keldi. Aldaǵy ýaqytta alleiany Serkebaev kóshesinen Radostovets kóshesine deiin jalǵastyryp, Rozybakiev kóshesine shyǵarýdy josparlap otyrmyz», – dedi ol.
Turǵyn Saýle Tkenbaeva buryn bul jerdiń qaraýsyz jatqanyn, qoqys kóp bolǵanyn aitady. Onyń pikirinshe, jańa alleia jaqyn mańdaǵy turǵyndar úshin mańyzdy demalys ornyna ainalǵan.
«Bizdi estidi, jarty jyldyń ishinde bári ózgerdi. Aýdan ákimdigine turǵyndar úshin osyndai paidaly ári ádemi oryndar jasap jatqanyna alǵys aitamyz», – deidi ol.
Inkliýzivti ortaǵa basymdyq
Aýdandaǵy taǵy bir mańyzdy joba – Serkebaev kóshesi, 83-úidegi inkliýzivti balalar alańy. Oǵan «Bolashaq Qurylys S» kompaniiasy 58 million teńge investitsiia salǵan.
Aýmaǵy 450 sharshy metr bolatyn alań «Shapaǵat» áleýmettik qyzmetter ortalyǵynyń janynda ornalasqan. Munda qozǵalysy shekteýli balalarǵa arnalǵan pandýstar, keń ótkelder, taktildi panelder men arnaiy oiyn jabdyqtary qarastyrylǵan.
«Alańnyń ereksheligi – munda múgedekter arbasymen qozǵalatyn balalar da ózdiginen oinai alady. Bala ózgelerdiń oiynyn syrttai baqylap qana otyrmai, oiynǵa ózi de qatysady», – deidi ortalyq tárbielenýshileriniń ata-anasy Anar Nurseiitova.
Bul joba qalalyq ortany abattandyrýda inkliýziia máselesiniń de eskerile bastaǵanyn kórsetedi. Óitkeni qoǵamdyq keńistik barlyq balaǵa birdei qoljetimdi bolýy kerek.
Qalalyq keńistik biryńǵai standartqa kóshýde
Bostandyq aýdanynda Baiqadamov, Sátpaev kóshelerinde jáne Nazarbaev dańǵyly boiynda da abattandyrý jumystary júrgizilgen.
Baiqadamov kóshesiniń bir bóligin jańartýǵa «Jan Sai Grýpp» kompaniiasy 126 million teńge bólgen. Munda trotýarlar jańartylyp, jaryqtandyrý jáne avtomatty sýarý júieleri ornatylǵan.
Al Sátpaev kóshesiniń Áýezov pen Jarokov kósheleriniń arasyndaǵy bóligin jańartýǵa 175 million teńge jumsalǵan. Jumys barysynda jaiaý júrginshiler joly, aryq júiesi men qorshaýlar retke keltirilip, taktildi taqtalar tóselgen.
Aýdan ákiminiń orynbasary Miras Zeinoldinniń aitýynsha, barlyq jumys Almatynyń biryńǵai dizain-kodyna sáikes júrgizilip jatyr. Bul kóshe infraqurylymynyń birizdi ári úilesimdi bolýyna múmkindik beredi.
Sonymen qatar Abai dańǵyly boiyndaǵy skver men Nazarbaev dańǵyly mańyndaǵy 1,5 gektar aýmaq ta jańartylǵan. Jobalar aiasynda jasyl jelek saqtalyp, serýen joldary, oryndyqtar men jaryqtandyrý júieleri ornatylǵan.
Abai dańǵyly boiyndaǵy skverdi jańartqan «SK ALMATY TAU» kompaniiasynyń bas direktory Aleksandr Moskovkinniń aitýynsha, jobada Almatynyń biryńǵai dizain-kody eskerilip, qurylys materialdarynyń sapasyna basymdyq berilgen.
«Jaryqtandyrý tirekteri, brýschatka, oryndyqtar men shaǵyn sáýlettik nysandar bir stilde jasaldy. Material tańdaǵanda betonnyń beriktigi men tósemtastardyń sapasyna erekshe nazar aýdardyq. Sonymen qatar jasyl jelekti saqtaý úshin avtomatty sýarý júiesi qarastyryldy», – dedi ol.
Áleýmettik jaýapkershilik nysan salýmen aiaqtalmaidy
Biznes pen ákimdik arasyndaǵy áriptestik qalalyq infraqurylymdy damytýǵa qosymsha múmkindik beretini anyq. Alaida mundai jobalardyń tiimdiligin tek investitsiia kólemimen nemese ashylǵan nysandar sanymen baǵalaý jetkiliksiz.
Eń aldymen, qoǵamdyq keńistikter turǵyndardyń naqty suranysyna sai bolýy kerek. Ekinshiden, olar balalarǵa, qarttarǵa jáne qozǵalysy shekteýli azamattarǵa qoljetimdi bolǵany mańyzdy. Úshinshiden, salynǵan nysandardyń tazalyǵy, qaýipsizdigi men jasyl jelektiń kútimi turaqty qamtamasyz etilýi qajet.
Aýdan ákimi Azamat Qaldybekov kásipkerlermen birlesken jumystyń jalǵasatynyn aitty.
«Ár jobanyń artynda jai ǵana abattandyrylǵan aýmaq emes, turǵyndardyń serýendeýine, demalýyna, sportpen ainalysýyna jáne aralasýyna arnalǵan jańa múmkindik tur. Kásipkerlerdiń áleýmettik mańyzy bar jobalarǵa óz qarajatyn baǵyttaýy – biznestiń áleýmettik jaýapkershiliginiń kórinisi», – dedi ol.
Bostandyq aýdanyndaǵy tájiribe biznestiń qala ómirine qosatyn úlesi tek salyq tóleýmen shektelmeitinin kórsetedi. Degenmen qaraýsyz jatqan jerdi saiabaqqa ainaldyrý – jumystyń basy ǵana. Onyń jyldar boiy taza, qaýipsiz ári qoljetimdi kúide saqtalýy qalalyq basqarý men áleýmettik jaýapkershiliktiń shynaiy kórsetkishi bolmaq.
