Pediatriia jáne balalar hirýrgiiasy ǵylymi ortalyǵynyń basqarma tóraǵasy, QR Densaýlyq saqtaý ministrliginiń shtattan tys pediatry Riza Boranbaeva balalardaǵy koronavirýs infektsiiasyn diagnostikalaý men emdeýdiń klinikalyq hattamasy jáne Kavasaki sindromy týraly aitty, dep habarlaidy QazAqparat.
Riza Boranbaevanyń aitýynsha, karantin kezinde respýblikalyq ortalyqtyń mamandary COVID-19 infektsiiasyna shaldyqqan jańa týǵan nárestelerdi ǵana emes, sonymen qatar basqa da aýrýmen aýyratyn balalardy emdep, kúndelikti baqylap otyrǵan.
Osylaisha jańa týǵan 10 775 nárestege jáne 2 229 balaǵa konsýltatsiialyq kómek kórsetildi, onyń ishinde jańa týǵan nárestelerdiń 90% jáne basqa jas tobyndaǵy balalardyń 81% aýyr jaǵdaidan shyǵaryldy.
«Tótenshe jaǵdai kezinde Pediatriia jáne balalar hirýrgiiasy ǵylymi ortalyǵynyń bazasynda koronavirýs juqtyrǵan onkologiialyq patologiiasy bar patsientter úshin provizorlyq jáne infektsiialyq bólimsheler ashyldy. Bul negizgi aýrý boiynsha himioterapiia kýrsyn úzbeýge múmkindik berdi. Balalar onkologiialyq/gematologiialyq bólimsheleri karantinniń barlyq kezeńinde jumys istedi, emdeý arasyndaǵy úzilisterde balalar men olardyń analary «Alataý» respýblikalyq balalar klinikalyq shipajaiynda saýyqtyrýdan ótti. Sondai-aq, tótenshe jaǵdai kezinde Túrkiiada emdelip jatqan onkologiialyq aýrýy bar 5 bala sanitariialyq aviatsiiamen ortalyqqa jetkizilip, em alýdy jalǵastyrdy»,– deidi Riza Boranbaeva.
Sonymen qatar, ol antibiotikalyq terapiia naqty infektsiia tirkelgen kezde ǵana taǵaiyndalatynyn atap ótti.
«Búgingi kúni respýblikada balalardaǵy koronavirýs infektsiiasyn diagnostikalaý men emdeýge arnalǵan jeke klinikalyq hattama jasaldy. Onda balalar men jasóspirimderdegi COVID-19 jáne mýltijúieli qabyný sindromynyń erekshelikteri kórsetilgen. Klinikalyq hattamany DDU men IýNISEF álemdegi sońǵy málimetterge júgine otyryp ázirledi. Balalarda koronavirýs infektsiiasy kóbine simptomsyz jáne jeńil túrde ótetin bolǵandyqtan olarǵa ambýlatoriialyq em usynylady. Sondyqtan mundai naýqastarǵa arnalǵan hattamada simptomatikalyq emdeý ǵana bar. Virýsqa qarsy preparattar qoldanylmaidy, óitkeni virýsqa qarsy preparattarda balaǵa qarsy kórsetilimder bar», - dep túsindirdi Riza Boranbaeva.
Sonymen qatar, Pediatriia jáne balalar hirýrgiiasy ǵylymi ortalyǵynyń basqarma tóraǵasy kei balalarda koronavirýspen aýyrǵannan keiin paida bolatyn Kavasaki tárizdi sindromy týraly aitty.
«Sońǵy eki aida bizdiń elde Kavasaki sindromy bar balalar tirkelgen joq. Biraq bosańsýǵa bolmaidy. Sebebi COVID-19 ekinshi tolqyny bolýy múmkin. Kavasaki tárizdi sindrom balalarda KVI-men aýyrǵannan keiin 2-6 apta aralyǵynda paida boldy. Koronavirýspen aýyrǵan balalardyń 97%-da SARS-CoV-2 antideneler anyqtaldy. Kavasaki sindromymen kóbine 3-9 jas aralyǵyndaǵy balalardyń aýyratyny baiqaldy. Olardyń basym bóligi - uldar (82%). Kavasaki sindromy bar balalardy emdeý 95% tiimdi boldy», - dedi dáriger.
