پەدياترييا جەنە بالالار حيرۋرگيياسى عىلىمي ورتالىعىنىڭ باسقارما تٶراعاسى, قر دەنساۋلىق ساقتاۋ مينيسترلٸگٸنٸڭ شتاتتان تىس پەدياترى ريزا بورانباەۆا بالالارداعى كوروناۆيرۋس ينفەكتسيياسىن دياگنوستيكالاۋ مەن ەمدەۋدٸڭ كلينيكالىق حاتتاماسى جەنە كاۆاساكي سيندرومى تۋرالى ايتتى, دەپ حابارلايدى قازاقپارات.
ريزا بورانباەۆانىڭ ايتۋىنشا, كارانتين كەزٸندە رەسپۋبليكالىق ورتالىقتىڭ ماماندارى COVID-19 ينفەكتسيياسىنا شالدىققان جاڭا تۋعان نەرەستەلەردٸ عانا ەمەس, سونىمەن قاتار باسقا دا اۋرۋمەن اۋىراتىن بالالاردى ەمدەپ, كٷندەلٸكتٸ باقىلاپ وتىرعان.
وسىلايشا جاڭا تۋعان 10 775 نەرەستەگە جەنە 2 229 بالاعا كونسۋلتاتسييالىق كٶمەك كٶرسەتٸلدٸ, ونىڭ ٸشٸندە جاڭا تۋعان نەرەستەلەردٸڭ 90% جەنە باسقا جاس توبىنداعى بالالاردىڭ 81% اۋىر جاعدايدان شىعارىلدى.
«تٶتەنشە جاعداي كەزٸندە پەدياترييا جەنە بالالار حيرۋرگيياسى عىلىمي ورتالىعىنىڭ بازاسىندا كوروناۆيرۋس جۇقتىرعان ونكولوگييالىق پاتولوگيياسى بار پاتسيەنتتەر ٷشٸن پروۆيزورلىق جەنە ينفەكتسييالىق بٶلٸمشەلەر اشىلدى. بۇل نەگٸزگٸ اۋرۋ بويىنشا حيميوتەراپييا كۋرسىن ٷزبەۋگە مٷمكٸندٸك بەردٸ. بالالار ونكولوگييالىق/گەماتولوگييالىق بٶلٸمشەلەرٸ كارانتيننٸڭ بارلىق كەزەڭٸندە جۇمىس ٸستەدٸ, ەمدەۋ اراسىنداعى ٷزٸلٸستەردە بالالار مەن ولاردىڭ انالارى «الاتاۋ» رەسپۋبليكالىق بالالار كلينيكالىق شيپاجايىندا ساۋىقتىرۋدان ٶتتٸ. سونداي-اق, تٶتەنشە جاعداي كەزٸندە تٷركييادا ەمدەلٸپ جاتقان ونكولوگييالىق اۋرۋى بار 5 بالا سانيتارييالىق اۆياتسييامەن ورتالىققا جەتكٸزٸلٸپ, ەم الۋدى جالعاستىردى»,– دەيدٸ ريزا بورانباەۆا.
سونىمەن قاتار, ول انتيبيوتيكالىق تەراپييا ناقتى ينفەكتسييا تٸركەلگەن كەزدە عانا تاعايىندالاتىنىن اتاپ ٶتتٸ.
«بٷگٸنگٸ كٷنٸ رەسپۋبليكادا بالالارداعى كوروناۆيرۋس ينفەكتسيياسىن دياگنوستيكالاۋ مەن ەمدەۋگە ارنالعان جەكە كلينيكالىق حاتتاما جاسالدى. وندا بالالار مەن جاسٶسپٸرٸمدەردەگٸ COVID-19 جەنە مۋلتيجٷيەلٸ قابىنۋ سيندرومىنىڭ ەرەكشەلٸكتەرٸ كٶرسەتٸلگەن. كلينيكالىق حاتتامانى ددۇ مەن يۋنيسەف ەلەمدەگٸ سوڭعى مەلٸمەتتەرگە جٷگٸنە وتىرىپ ەزٸرلەدٸ. بالالاردا كوروناۆيرۋس ينفەكتسيياسى كٶبٸنە سيمپتومسىز جەنە جەڭٸل تٷردە ٶتەتٸن بولعاندىقتان ولارعا امبۋلاتورييالىق ەم ۇسىنىلادى. سوندىقتان مۇنداي ناۋقاستارعا ارنالعان حاتتامادا سيمپتوماتيكالىق ەمدەۋ عانا بار. ۆيرۋسقا قارسى پرەپاراتتار قولدانىلمايدى, ٶيتكەنٸ ۆيرۋسقا قارسى پرەپاراتتاردا بالاعا قارسى كٶرسەتٸلٸمدەر بار», - دەپ تٷسٸندٸردٸ ريزا بورانباەۆا.
سونىمەن قاتار, پەدياترييا جەنە بالالار حيرۋرگيياسى عىلىمي ورتالىعىنىڭ باسقارما تٶراعاسى كەي بالالاردا كوروناۆيرۋسپەن اۋىرعاننان كەيٸن پايدا بولاتىن كاۆاساكي تەرٸزدٸ سيندرومى تۋرالى ايتتى.
«سوڭعى ەكٸ ايدا بٸزدٸڭ ەلدە كاۆاساكي سيندرومى بار بالالار تٸركەلگەن جوق. بٸراق بوساڭسۋعا بولمايدى. سەبەبٸ COVID-19 ەكٸنشٸ تولقىنى بولۋى مٷمكٸن. كاۆاساكي تەرٸزدٸ سيندروم بالالاردا كۆي-مەن اۋىرعاننان كەيٸن 2-6 اپتا ارالىعىندا پايدا بولدى. كوروناۆيرۋسپەن اۋىرعان بالالاردىڭ 97%-دا SARS-CoV-2 انتيدەنەلەر انىقتالدى. كاۆاساكي سيندرومىمەن كٶبٸنە 3-9 جاس ارالىعىنداعى بالالاردىڭ اۋىراتىنى بايقالدى. ولاردىڭ باسىم بٶلٸگٸ - ۇلدار (82%). كاۆاساكي سيندرومى بار بالالاردى ەمدەۋ 95% تيٸمدٸ بولدى», - دەدٸ دەرٸگەر.
