اقمولا وبلىسىنىڭ بەستٶبە كەنتٸندەگٸ شاحتادا زاڭسىز التىن ٸزدەگەن ادام قازا تاپتى. الدىن الا مەلٸمەت بويىنشا, كەن ورنىندا تاس وپىرىلىپ, ەر ادام ٷيٸندٸ استىندا قالعان, دەپ حابارلايدى ult.kz.
قايعىلى وقيعا تۋرالى اقمولا وبلىستىق پوليتسييا دەپارتامەنتٸ حابارلادى. پوليتسييانىڭ مەلٸمەتٸنشە, ازامات شاحتا اۋماعىنا زاڭسىز كٸرٸپ, التىن ٸزدەگەن. الايدا كەن ورنىندا تاس قۇلاپ, ول ٷيٸندٸ استىندا قالىپ قويعان. العان جاراقاتىنان وقيعا ورنىندا كٶز جۇمعان.
اتالعان جاعدايعا بايلانىستى كٷزەتٸلەتٸن نىسانعا زاڭسىز كٸرۋ دەرەگٸ بويىنشا قىلمىستىق ٸس قوزعالدى.
«قازٸرگٸ ۋاقىتتا قاجەتتٸ تەرگەۋ شارالارى جٷرگٸزٸلٸپ, وقيعانىڭ مەن-جايى انىقتالىپ جاتىر», – دەپ حابارلادى ٶڭٸرلٸك پوليتسييا دەپارتامەنتٸ.