2026 jylǵy 25 shildeden bastap Qazaqstan Respýblikasy men Birikken Arab Ámirlikteri arasynda júrgizýshi kýálikterin ózara taný jáne aiyrbastaý týraly kelisim kúshine endi. Bul eki el azamattaryna ulttyq júrgizýshi kýálikterin paidalaný men aiyrbastaý rásimin aitarlyqtai jeńildetedi, dep habarlaidy ult.kz.
Kelisimge Qazaqstannyń Ishki ister ministri Erjan Sadenovtiń BAÁ-ge jumys sapary barysynda qol qoiylǵan.
Jańa tártipke sáikes, Birikken Arab Ámirlikterine ýaqytsha barǵan Qazaqstan azamattary jergilikti zańnamaǵa sai qazaqstandyq júrgizýshi kýáligin paidalana alady. Al BAÁ-ge turaqty qonys aýdarǵan jaǵdaida «B» sanaty men «B1» kishi sanaty boiynsha teoriialyq jáne praktikalyq emtihan tapsyrmai-aq júrgizýshi kýáligin aiyrbastaýǵa múmkindik alady.
Dál osyndai jeńildik Qazaqstanǵa turaqty turýǵa kóshken BAÁ azamattaryna da beriledi.
Júrgizýshi kýáligin aiyrbastaý úshin jaramdy ulttyq júrgizýshi kýáligi, qoldanystaǵy turýǵa yqtiiarhat, qujattyń resmi aýdarmasy jáne mindetti meditsinalyq tekserýden ótkeni týraly anyqtama qajet bolady. Bul rette ulttyq júrgizýshi kýáligi tárkilenbeidi, al aiyrbastaý rásimi aiaqtalǵannan keiin eki eldiń ýákiletti organdary bir-birin tek rásimniń júrgizilgeni týraly habardar etedi.
Aita keteiik, jeńildetilgen tártip tek «B» jáne «B1» sanattaryna ǵana qoldanylady. Al ózge sanattaǵy júrgizýshi kýálikteri qabyldaýshy memlekettiń zańnamasyna sáikes aiyrbastalady.
Ishki ister ministrligi azamattardy shetelde júrgen kezde qabyldaýshy eldiń zańdaryn saqtaýǵa, qoǵamdyq tártipti qurmetteýge jáne Qazaqstannyń oń halyqaralyq bedelin qalyptastyrýǵa úles qosýǵa shaqyrdy.
