Qazaqstandyq qoǵamdyq damý institýty (QQDI) qoǵamdyq damýdyń ózekti máselelerin kásibi taldap, kópshilikke túsinikti tilmen jetkize alatyn jańa býyn sarapshylaryn daiarlaýǵa baǵyttalǵan «Sarapshy» mediajobasyn iske qosty, dep habarlaidy ult.kz.
QR Mádeniet jáne aqparat ministrliginiń qoldaýymen júzege asyp jatqan joba mádeniet, qoǵamdaǵy minez-qulyq jáne ádep máselelerin qamtidy.
Prezident Qasym-Jomart Toqaev qoǵamda jańa ádep qaǵidalaryn qalyptastyrýdyń mańyzyn birneshe ret atap ótken. Memleket basshysy sońǵy Joldaýynda: «Elimiz ornyqty damýy úshin qoǵamda jańa etika ornyǵýy qajet. «Adal azamat» ideologiiasy ómirimizdiń ajyramas bóligine ainalýy kerek», – degen bolatyn.
Jobaǵa 140-tan astam ótinim túsip, konkýrstyq irikteý nátijesinde 25 qatysýshy tańdaldy. Olardyń qatarynda qoǵamdyq damý, áleýmettik qatynastar, mádeniet jáne kommýnikatsiia salalarynda tájiribesi bar zertteýshiler, taldaýshylar men praktik mamandar bar.
31 qazan men 14 qarasha aralyǵynda qatysýshylar bilikti sarapshylardan dáris alyp, tájiribelik sabaqtarǵa qatysady. Oqý baǵdarlamasy sarapshylyq kásibilikti arttyrýǵa, BAQ-pen tiimdi bailanys ornatýǵa jáne kópshilik aldynda sóileý daǵdylaryn damytýǵa baǵyttalǵan.
Sondai-aq qatysýshylar óz pikirin naqty derektermen negizdep, kúrdeli qoǵamdyq máselelerdi kópshilikke túsinikti tilde jetkizýdi úirenedi.
