QHR biznes ókilderimen «dóńgelek ústel» formatynda ótken kezdesýde Prezident qytailyq seriktesterge shynaiy rizashylyǵyn bildirip, Qazaqstan men Qytai arasyndaǵy máńgilik ári jan-jaqty strategiialyq áriptestikke joǵary baǵa berdi, dep habarlaidy ult.kz.
Prezident Qazaqstan-Qytai qarym-qatynasynyń jańa «altyn otyz jyldyǵyna» birge qadam basqanyn atap ótti. Osy oraida Qytai Halyq Respýblikasynyń Tóraǵasy Si Tszinpin myrzaǵa zor alǵys aitty.
Qasym-Jomart Toqaev Qytai Qazaqstan ekonomikasyna 30 milliard dollardan astam investitsiia salǵanyn aitty. Memleket basshysynyń aitýynsha, joǵary deńgeidegi saiasi senim saýda-ekonomikalyq jáne investitsiialyq yntymaqtastyqty odan ári keńeitýge berik negiz qalaidy.
– Byltyr ekijaqty saýda kólemi 49 milliard dollarǵa jetti. Bul – rekordtyq kórsetkish. Qytai Qazaqstan ekonomikasyna 30 milliard dollardan astam investitsiia saldy. Qazir Qazaqstanda qytai kapitaly bar 8500-den astam kásiporyn tabysty jumys istep jatyr. Sonyń ishinde CNPC, CITIC jáne Huawei siiaqty iri kompaniialardy atap ótý qajet. Biz Qytai biznes ókilderiniń Qazaqstan ekonomikasyn jańǵyrtýǵa súbeli úles qosyp jatqanyn joǵary baǵalaimyz, – dedi Prezident.
Qasym-Jomart Toqaev jahandyq ǵylym men innovatsiia ortalyqtarynyń biri sanalatyn Shanhai qalasyndaǵy Dúniejúzilik jasandy intellekt konferentsiiasy qarsańynda bas qosýdyń simvoldyq máni zor ekenin aitty. Sonymen qatar qatysýshylarǵa Qazaqstannyń tsifrlyq transformatsiianyń basymdyqtaryn tanystyryp, tehnologiialyq yntymaqtastyqtyń negizgi baǵyttaryna toqtaldy.
Prezidenttiń aitýynsha, Qazaqstan jasandy intellektini bolashaq ekonomikalyq ósimniń basty faktorlarynyń biri retinde qarastyrady, sondai-aq halyqaralyq investorlardy tartý úshin zamanaýi tsifrlyq infraqurylym jasaqtaýda.
– Ekibastuz qalasyndaǵy Data Center Valley jobasyna erekshe toqtalǵym keledi. Bul – elimizdiń biregei strategiialyq bastamasy. Atalǵan joba Qazaqstan men búkil Ortalyq Aziia tsifrlyq infraqurylymynyń negizgi tiregi bolady dep sanaimyz. Basty maqsat – derekterdi óńdeý ortalyqtaryn, bultty servisterdi jáne jasandy intellekt infraqurylymyn damytýǵa arnalǵan halyqaralyq deńgeidegi platforma qalyptastyrý. Biz qytailyq seriktesterimizben ózara tiimdi yntymaqtastyqty nyǵaita túsýge múddelimiz, – dedi Memleket basshysy.
Prezident tsifrlyq logistikany jáne perspektivti kólik dálizderin damytqan jón dep sanaidy.
– Qazaqstan Qytaidy Ortalyq Aziiamen, Kavkazben, Taiaý Shyǵyspen jáne Eýropamen bailanystyratyn negizgi kólik-logistika haby bolýǵa tiis. Basty maqsat – Eýraziianyń biryńǵai tsifrlyq kólik keńistigin qalyptastyrý. Bir sózben, derekter tsifrlyq jeli arqyly qalai tez jiberilse, taýarlar da shekaradan dál sondai jyldam ári tiimdi ótetin keńistik qurýymyz kerek, – dedi Qasym-Jomart Toqaev.
Sondai-aq Prezident asa mańyzdy mineraldardy igerý salasyn perspektivti baǵyt retinde atady. Ol Qazaqstan strategiialyq resýrstardyń qory boiynsha álemdik kóshbasshylar qataryna enetinin jáne halyqaralyq seriktestermen birlese qosylǵan quny joǵary óndiristi damytýdy kózdeitinin málimdedi.
