Memleket basshysy halyqaralyq «EKSPO-2017» mamandandyrylǵan kórmesiniń ashylý rásimine qatysty, dep habarlaidy "Ult aqparat" Aqordaǵa silteme jasap.
Saltanatty rásimde sóz sóilegen Nursultan Nazarbaev barsha jurtty Astanada halyqaralyq «EKSPO-2017» mamandandyrylǵan kórmesiniń ashylýymen quttyqtady.
Elbasy 115 memleket pen 22 halyqaralyq uiym qatysqan EKSPO kórmesin Qazaqstannyń TMD jáne Shyǵys Eýropa elderi arasynan birinshi bolyp ótkizip otyrǵanyn atap ótti.
– Bizdiń ótinishimizdi jáne usynǵan taqyrybymyzdy qabyl alǵandary úshin barlyq elderge rizashylyǵymdy bildiremin. Osyndai aýqymdaǵy kórme – bir memlekettiń ǵana atqarǵan isi emes, bul – osynda óz jetistikterin kórsetýge kelgen halyqaralyq qoǵamdastyqtyń eńbegi. Astanadaǵy EKSPO halyqaralyq kórmesi – jahandyq keńistikte elimizdi tanytýdyń jáne «Qazaqstan» ulttyq brendin ilgeriletýdiń jańa belesi. Biz «Bolashaqtyń energiiasy» taqyrybyn usyna otyryp, ǵylymi progrestiń bel ortasynda bolýdy qalaimyz, – dedi Nursultan Nazarbaev.
Memleket basshysy osydan bir jarym ǵasyr buryn Londonda ótken alǵashqy dúnie júzilik kórmeden keiin adamzat orasan zor tehnologiialyq ózgeristerdi bastan ótkergenine toqtalyp, búginde tiimdi jáne qaýipsiz energiia salasyndaǵy tyń jańalyqtar qarsańynda turǵanymyzdy atap ótti. Qazaqstan Prezidenti «EKSPO-2017» kórmesi osy jahandyq úderiske óziniń airyqsha úles qosatynyna senim bildirdi.
– Zamanymyzdyń ozyq oily adamdarynyń qatysýy josparlanǵan is-sharalar adamzat damýynyń jańa baǵyttaryn aishyqtaidy. Milliondaǵan qazaqstandyqtar men dúnie júziniń túkpir-túkpirinen keletin júz myńdaǵan qonaq álemdik ǵylymi jáne injenerlik aqyl-oidyń keremet jetistikterimen tanysatyn bolady. EKSPO baǵdarlamasynda 6 myń túrli is-shara ótkizý josparlanǵan. Olar álem elderi arasyndaǵy ózara túsinistikti damytýǵa, ǵylym, biznes jáne qoǵam arasyndaǵy tabysty is-qimylǵa, sondai-aq Qazaqstan mádenietimen tanysýǵa septigin tigizedi. Biz kelýge tilek bildirgenderdiń barlyǵyn elimizdiń basqa da óńirlerin aralap kórýge, biregei tabiǵatymyzben jáne tarihi muramyzben tanysýǵa shaqyramyz, – dedi Nursultan Nazarbaev.
Memleket basshysy álemniń ekologiialyq turǵydan teńdes jáne ornyqty damýynyń mańyzdylyǵyna toqtalyp, «EKSPO-2017» taqyrybynyń bizdiń elimiz úshin ózekti ekenine erekshe nazar aýdardy.
– Qazaqstan orasan zor kómirsýtek qorynyń bar ekenine qaramastan, jańartylatyn energiia kózderine belsendi túrde kóshetin bolady. Osyndai maqsat bizdiń «Strategiia-2050» baǵdarlamamyzda jáne «Jasyl ekonomikaǵa» kóshý jónindegi tujyrymdamamyzda kórinis tapty. Qazaqstan 2050 jylǵa qarai jańartylatyn kózderdiń esebinen elektr energetikasynyń jalpy kóleminiń jartysyn óndire alatyn bolady. Sonymen birge ekonomikada energiianyń jumsalýy da azaiady, – dedi Qazaqstan Prezidenti.
Nursultan Nazarbaev «Astana EKSPO-2017» kórme kesheniniń nysandary men halyqaralyq pavilondardyń qalai paidalanylatyny jóninde aityp berdi.
– Kórmeni aralaýshylar nazaryna basty nysan – jer sharyn beineleitin «Nur Álem» sferasy usynylady. Onyń ár deńgeii energiianyń belgili bir túrine arnalǵan. Sferanyń ózeginde bizdiń Ulttyq pavilon ornalasqan. Onda qazaqstandyq ǵalymdardyń eń ozyq jobalary kórsetilgen Qazaqstanmen tanysý aimaǵy jáne «Jasampaz energiia» aimaǵy bar. EKSPO kórmesine memleketter men halyqaralyq uiymdardyń 130-dan astam ekspozitsiialary ákelindi. Eki taqyryptyq pavilonda energetikanyń evoliýtsiiasy, onyń HHI ǵasyrdaǵy problemalary jáne osy saladaǵy tehnologiialyq órleý sáti kórsetiledi, – dedi Memleket basshysy.
Qazaqstan Prezidenti kórmeniń iskerlik baǵdarlamasyna toqtaldy. Onyń aiasynda Astana ekonomikalyq forýmy, Shetel investorlarynyń keńesi, Islam yntymaqtastyǵy uiymynyń sammiti siiaqty birqatar iri halyqaralyq is-sharalar ótkizý josparlanǵan.
Memleket basshysy kórmeniń halyqaralyq ózara yntymaqtastyqqa eleýli tyń serpin berip, elimizdiń ǵylymyn damytýǵa jáne ekonomikamyzdy jańǵyrtýǵa septigin tigizetinine senim bildirdi.
Nursultan Nazarbaev «EKSPO-2017» kórmesi aiaqtalǵan soń onyń infraqurylymy odan ári paidalanylatyny týraly aitty.
– Bul jerde «Astana» halyqaralyq qarjy ortalyǵy jumys isteitin bolady. «Jasyl» tehnologiialar men investitsiialardy damytý jónindegi halyqaralyq ortalyq qurylady. IT-startaptardyń halyqaralyq tehnoparki ashylady. Osylaisha, elimizdiń, óńirimizdiń jáne álemniń igiligi úshin EKSPO-daǵy «innovatsiianyń tamyr soǵysy» jalǵasatyn bolady, – dedi Qazaqstan Prezidenti.
Sońynda Memleket basshysy «EKSPO-2017» kórmesin daiyndaý úderisine qatysýshylardyń barlyǵyna shynaiy qoldaý kórsetkenderi jáne kórme ideiasyn júzege asyrýǵa atsalysqandary úshin alǵys aitty.
– Bizdiń mártebeli qonaqtarymyzǵa – Astanadaǵy «EKSPO-2017» kórmesiniń ashylý saltanatyna qatysýǵa ýaqyt taýyp kelgen memleketter men úkimetter basshylaryna erekshe rizashylyq bildiremin, – dedi Nursultan Nazarbaev.
